टोकियो – विश्वव्यापी रूपमा बढ्दै गएको तापमान (ग्लोबल वार्मिङ) का कारण जापानमा आँधी (टाइफुन) सँगै हुने वर्षाको मात्रा करिब तीन गुणाले बढ्ने एक अध्ययनले देखाएको छ । क्युसु विश्वविद्यालयका अनुसन्धानकर्ताहरूले गरेको ‘सिमुलेसन’ (कृत्रिम परीक्षण) ले यस्तो चिन्ताजनक नतिजा देखाएको हो ।
अनुसन्धान टोलीले आँधीको मुख्य केन्द्र वरपर हुने वर्षाको मात्र नभई आँधीभन्दा टाढा हुने ‘रिमोट प्रेसिपिटेसन’ (बाहिरी घेराको प्रभावले हुने वर्षा) को समेत विश्लेषण गरेर पूर्वानुमानको सटीकतामा सुधार गरेको जनाएको छ । सामान्यतया आँधीको बाहिरी घेराको प्रभावले यसको केन्द्रभन्दा धेरै टाढा पनि भारी वर्षा गराउने गर्दछ ।
अनुसन्धानकर्ताहरूले सन् २०१० देखि २०१९ सम्मका जुलाई, अगस्ट र सेप्टेम्बर महिनामा पश्चिमी उत्तर प्रशान्त क्षेत्रमा उत्पन्न भएका ३८ वटा आँधीहरूको नमुना (मोडलिङ) तयार पारेका थिए । यस क्रममा उनीहरूले विश्वको औसत तापक्रम पूर्व-औद्योगिक स्तरको तुलनामा करिब २.५ देखि ३ डिग्री सेल्सियसले बढेको अवस्थाको परिकल्पना गरेका थिए । सिमुलेसनको नतिजा अनुसार, जापानमा दैनिक औसत वर्षा २२.५२ मिलिमिटरबाट बढेर ७०.०४ मिलिमिटर पुग्ने देखिएको छ । यो तथ्याङ्क हालको वर्षाको मात्रा भन्दा करिब ३.१ गुणा बढी हो ।
क्युसु विश्वविद्यालयको विज्ञान संकायका ‘क्लाइमेट डाइनामिक्स’ (जलवायु गतिशीलता) प्राध्यापक र्युइची कावामुराले भने, ‘विपद् जोखिमको मूल्यांकन गर्न आँधीभन्दा टाढा हुने वर्षाको पूर्वानुमान गर्नु अत्यन्त महत्वपूर्ण छ ।’ प्राध्यापक कावामुराले अगाडि भने, ‘भविष्यमा आँधीको केन्द्रभन्दा टाढाका क्षेत्रहरूमा पनि स्थानीयकृत मुसलधारे वर्षा तीब्र हुने सम्भावना छ । त्यसैले नीति निर्माण गर्दा यो तथ्यलाई गम्भीरतापूर्वक लिइनेछ भन्ने मलाई आशा छ ।’
