टोकियो – जापानमा भिन्टेज (पुरानो तर बहुमूल्य) टिसर्ट र अन्य सेकेन्ड ह्यान्ड सामानहरूको मूल्य आकाशिएको छ । युवाहरूले यस्ता दुर्लभ वस्तुहरूमा लगानी गर्न थालेका छन् जसको मूल्य समयसँगै बढ्दै जान्छ । साथै, उपभोक्ताहरूले नयाँ उत्पादनहरू किन्नबाट जोगिन थालेपछि पुराना सामानको बजार चम्किएको हो ।
भविष्यको अनिश्चितताले पनि यस प्रवृत्तिलाई बढावा दिएको छ । रियुज इकोनोमिक जर्नलका अनुसार, सन् २०२३ मा जापानमा सेकेन्ड ह्यान्ड सामानको बजार करिब ३१.३ खर्ब येन (लगभग २९.७ खर्ब नेपाली रुपैयाँ) पुगेको छ । यो सर्वेक्षण सुरु भएको सन् २०१० देखि लगातार १४ औं वर्षको वृद्धि हो ।
टोकियोको हाराजुकुस्थित ‘असम बाई ब्रिंग’ नामक भिन्टेज कपडा पसलमा जुलाईको मध्यतिर एउटा पुरानो टिसर्ट ७ लाख ९० हजार येन (लगभग ७ लाख ५० हजार रुपैयाँ) मा बिक्रीको लागि राखिएको थियो । यो टिसर्ट सन् १९९० को दशकको एनिमे फिल्म तथा मांगा ‘अकिरा’को हो, जसको वास्तविक मूल्य त्यतिबेला करिब ३,००० येन (लगभग २,८५० रुपैयाँ) मात्र थियो । पछि उक्त टिसर्ट बिक्री पनि भयो ।
पसलका २५ वर्षीय म्यानेजर युकी सिमिजुका अनुसार, कपडामा परेको दाग वा च्यातिएको प्रिन्ट जस्ता व्यक्तिगत भिन्नताहरूले समेत कहिलेकाहीँ त्यसको मूल्य बढाउन सक्छ ।
यसैबीच, ३८ वर्षीय भिन्टेज संकलक सुसुमु ताकाहासीले जुलाईको अन्त्यमा सोही पसलबाट एउटा चर्चित ब्यान्डको टिसर्ट १ लाख ५० हजार येन (लगभग १ लाख ४२ हजार रुपैयाँ) मा किने । ‘यसको आफ्नै कथा छ, र मैले यसलाई लगाउँदा वा यो फाट्दा पनि यसको मूल्य रहिरहन्छ,’ उनले भने, ‘यदि मैले यसलाई प्रयोग गर्न छोडेँ भने, म यसलाई बेच्न पनि सक्छु ।’
टोकियोस्थित भिन्टेज रिटेलर ‘स्टेगोल्ड इंक’ का अनुसार, युवाहरूले पार्ट-टाइम कामबाट कमाएको पैसाले यस्ता अद्वितीय र विलासी वस्तुहरू किन्ने गरेका छन् र आफ्ना खरिदहरू सामाजिक सञ्जालमा सेयर गर्छन् । जब उनीहरूलाई ती वस्तुहरूमा रुचि हुँदैन, उनीहरूले त्यसलाई बेचेर अर्को भिन्टेज सामान किन्ने पैसा जुटाउँछन् ।
विज्ञापन एजेन्सी डेन्ट्सु इंककी डिजिटल योजनाकार तथा युवा उपभोक्ता व्यवहार विज्ञ आरिसा तानीका अनुसार, फेसन आत्म-अभिव्यक्तिको माध्यम भए तापनि युवाहरू आर्थिक भविष्यप्रतिको चिन्ताका कारण भिन्टेज कपडाको लगानी लाभतर्फ आकर्षित भएका हुन सक्छन् ।
