जापानको पासपोर्ट सबैभन्दा शक्तिशाली, नेपाल १०४ औं स्थानमा

टोकियो – कुनै देशको पासपोर्ट कति शक्तिशाली छ भनेर मापन गर्न उक्त देशका नागरिक वा पासपोर्टधारीले कति देशमा सहज आवतजावत अनुमति पाउँछन् भन्ने कुरालाई आधार मान्ने गरिन्छ ।

हेनली पासपोर्ट इन्डेक्सले इन्टरनेसनल एयर ट्रान्सपोर्ट अथोरिटी आइएटीएले प्रदान गरेको तथ्यांक र सूचनालाई मध्यनजर गर्दै वर्षेनी शक्तिशाली र कमजोर राहदानीको सूची प्रकाशित गर्दछ।

विश्वभरका देशको पासपोर्टको र्‍याङ्किङ गर्दै आएको संस्था ‘हेनेली पासपोर्ट इन्डेक्स’ले सन् २०२१ मा कुन देशको पासपोर्ट कति शक्तिशाली भन्ने सूची प्रकाशन गरेको छ ।

कुन देशका नागरिकले कति देशमा अन अराइभल भिसा वा भिसा फ्रि इन्ट्री पाउँछन् भन्ने तथ्याङ्कलाई विश्लेषण गरेर सूची प्रकाशन गरेको हेनेलीले जनाएको छ ।

‘हेनेली पासपोर्ट इन्डेक्स’का अनुसार सन् २०२१ मा जापानको पासपोर्ट विश्वकै सबैभन्दा शक्तिशाली पासपोर्ट बन्न सफल भएको छ । जापानी नागरिकले १९१ देशमा सहज आवतजावत अनुमति प्राप्त गर्न सक्छन् ।

दोस्रो स्थानमा रहेको सिंगापुरका पासपोर्टधारीले भने १९० देशमा सहज आवतजावत अनुमति प्राप्त गर्छन् ।

तेस्रो स्थानमा दक्षिण कोरिया रहेको छ । यो देशका नागरिकले १८९ देशमा सहज आवतजावत अनुमति प्राप्त गर्न सक्छन् ।

त्यस्तै फिनल्यान्ड, जर्मनी लगायतका देशहरुको पासपोर्ट पनि शक्तिशाली पासपोर्टको रुपमा देखिएका छन्।

द्रुत रुपमा आर्थिक वृद्धि गरिरहेको छिमेकी मुलुक चीन भने ७० औं स्थानमा रहेको छ । चिनियाँ नागरिकले ७५ देशमा भिसा फ्रि इन्ट्री पाउँछन् ।

त्यस्तै छिमेकी देश भारत ८५ औं स्थानमा रहेको छ । भारतीय नागरिकले ५८ देशमा सहज प्रवेश गर्न सक्छन् ।

सूचकांकका अनुसार नेपालको राहदानी भने कमजोर देशको सूचीमा परेको छ। १०४ औं स्थानमा रहेको नेपालका नागरिकले भने ३८ देशमा मात्रै सहज प्रवेश पाउँछन् ।

अन्तिम स्थानमा भने इराक र अफगानिस्तान रहेका छन् । १०९ औं स्थानमा रहेको इराकका नागरिकले २८ र ११० औं स्थानमा रहेको अफगानिस्तानका नागरिकले २६ देशमा मात्रै सहज प्रवेश पाउँछन् ।