टोकियो – जापानमा रहेका नेपाली प्रतिभाहरूबीचको प्रतिस्पर्धामा प्रतिस्पर्धीलाई पछि पार्दै केशव शर्माले ‘प्रथम जापान लोक तारा-२०२६’ को ऐतिहासिक उपाधि चुम्न सफल भएका छन् । नेपाली लोक संगीतको संरक्षण र प्रवर्द्धन गर्ने उद्देश्यका साथ राष्ट्रिय लोक तथा दोहोरी गीत प्रतिष्ठान नेपाल, जापान शाखाले आयोजना गरेको ‘अम्बर बिरही गुरुङ सांगीतिक साँझ’ तथा ‘प्रथम जापान लोक तारा-२०२६’मा शर्माले सो उपाधि जितेका हुन् ।
टोकियोस्थित मेगुरो कुमिन सेन्टरमा आइतबार सम्पन्न भव्य सांगीतिक समारोहमा फाइनल चरणमा पुगेका उत्कृष्ट पाँच प्रतिस्पर्धीहरूलाई प्रत्यक्ष (लाइभ) गायन प्रस्तुति गराइएको थियो । निर्णायकहरूको मूल्याङ्कनका आधारमा शर्मा प्रथम घोषित भएका हुन् । उपाधिसँगै उनले नगद १ लाख १ हजार येन, ट्रफी र प्रमाणपत्र प्राप्त गरे । प्रतियोगितामा तनुजा शाही द्वितीय (५१ हजार येन), पार्वती आचार्य तृतीय (३१ हजार येन) तथा किरण प्रभात र आरती परियारले सान्त्वना स्थान (जनही ११ हजार येन) हासिल गरे ।
प्रतियोगिताको निर्णायक मण्डलमा प्रतिष्ठानका केन्द्रीय सचिव एवं गायक रामकृष्ण बम मल्ल (संयोजक), चर्चित गायक सूर्य खड्का र गायिका ज्योति लोहनी रहनुभएको थियो ।
रामकृष्ण बम मल्ललाई ‘लोक सङ्गीत शिरोमणि’को सम्मान
सोही समारोहमा नेपाली लोक सङ्गीतको क्षेत्रमा विशिष्ट योगदान पुर्याएबापत लोकप्रिय गायक, सर्जक एवं निर्णायक संयोजक रामकृष्ण बम मल्ललाई ‘लोक सङ्गीत शिरोमणि-२०२६’ बाट विभूषित गरिएको छ । मौलिक सिर्जना, गायन र नयाँ पुस्तालाई लोक सङ्गीतमा डोर्याउन उहाँले खेल्नुभएको भूमिकाको उच्च मूल्याङ्कन गर्दै आयोजकले सो सम्मान प्रदान गरेको हो ।
सम्मान ग्रहणपछि मल्लले प्रवासमा रहेर पनि नेपाली भाषा र मौलिक कलाको जगेर्ना गर्न प्रतिष्ठानको जापान शाखाले खेलेको भूमिकाको प्रशंसा गर्दै यो सम्मान सम्पूर्ण सङ्गीतकर्मीहरूको गौरव भएको बताउनुभयो ।
अम्बर बिरहीको प्रस्तुतिले हल मन्त्रमुग्ध
कार्यक्रमको मुख्य आकर्षणका रूपमा लोक सङ्गीतका जिउँदो इतिहास मानिने वरिष्ठ गायक एवं सर्जक अम्बर बिरही गुरुङ रहनुभएको थियो । ७२ वर्षको उमेरमा पनि ऊर्जावान् देखिनुभएका प्रतिष्ठानका संस्थापक अध्यक्ष गुरुङले आफ्ना दर्जनौँ कालजयी गीतहरू प्रस्तुत गर्दा हलमा उपस्थित दर्शकहरू भावुक बन्दै नाचेका थिए । उहाँको प्रस्तुतिले प्रवासमा नेपालीपन र मौलिक संस्कृतिको जीवन्त झझल्को दिएको थियो ।
कार्यक्रमका प्रमुख अतिथि एवं जापानका लागि नेपाली कार्यवाहक राजदूत हरिहरकान्त पौडेलले प्रवासमा रहेर पनि आफ्नो मौलिक संस्कृति जोगाउनु गौरवको कुरा भएको बताउनुभयो । उहाँले प्रतिष्ठानका यस्ता गतिविधिले नेपाली समुदायबीचको एकता र पहिचानलाई अन्तर्राष्ट्रिय स्तरमा थप मजबुत बनाउने विश्वास व्यक्त गर्नुभयो ।
प्रतिष्ठान जापान शाखाका अध्यक्ष समुन्द्र राज पौडेलको सभापतित्वमा सम्पन्न कार्यक्रममा प्रथम उपाध्यक्ष सोना केसीले स्वागत मन्तव्य राख्नुभएको थियो। कार्यक्रमको सञ्चालन सचिव दिपक कंडेल ‘सफल’, महिला उपाध्यक्ष बाला दुरा र सल्लाहकार रमेश पाण्डे (छवि) ले संयुक्त रूपमा गर्नुभएको थियो । जापानभर रहेका नेपाली समुदायको बाक्लो उपस्थिति रहेको उक्त कार्यक्रमलाई जापानमा आयोजना गरिएको अहिलेसम्मकै व्यवस्थित र गरिमामय लोक सङ्गीतको उत्सवका रूपमा लिइएको छ ।
