टोकियो – जापानी सेयर बजारको प्रमुख सूचकांक ‘निक्केई’ले बिहीबार इतिहासमै पहिलोपटक ६० हजारको मनोवैज्ञानिक विन्दु पार गरी नयाँ रेकर्ड कायम गरेको छ । प्रविधि क्षेत्रका ठूला कम्पनीहरूको सेयरमा देखिएको उछालले बजारलाई ऐतिहासिक उचाइमा पुर्याए तापनि बजार ‘ओभरहिट’ (अत्यधिक तातेको) भएको चिन्ताबीच मध्याह्न सत्रमा भने गिरावट देखिएको छ ।
बिहीबारको कारोबारमा २२५ कम्पनीहरूको संक्षिप्त सूचक ‘निक्केई’ अघिल्लो दिनको तुलनामा ६३३.७५ अंक (१.०६ प्रतिशत) ले घटेर ५८,९५२.११ मा बन्द भयो । यस्तै, बृहत मानिने ‘टोपिक्स’ सूचक पनि ४४.८९ अंक (१.२० प्रतिशत) ले ओरालो लाग्दै ३,७००.१० मा सीमित भएको छ ।
इरानले हर्मुज जलडमरूमा केही जहाजहरू नियन्त्रणमा लिएको दाबी गरेसँगै कच्चा तेलको मूल्यमा वृद्धि भएको छ । यस भूराजनीतिक तनावका कारण लगानीकर्ताहरू सुरक्षित लगानीतर्फ आकर्षित हुँदा अमेरिकी डलरको तुलनामा येन कमजोर भई १५९ को तहमा पुगेको छ । मध्याह्न सम्ममा डलरको विनिमय दर १५९.५४ येन कायम भएको थियो ।
आर्टिफिसियल इन्टेलिजेन्स र सेमिकन्डक्टर (अर्धचालक) क्षेत्रका कम्पनीहरूको बलियो प्रदर्शनका कारण कारोबारको सुरुमै निक्केई ६०,०१३.९८ सम्म पुगेको थियो । कम्पनीहरूको आगामी वित्तीय प्रतिवेदन सुखद रहने अपेक्षाले लगानीकर्ताहरू यसतर्फ आकर्षित भएका थिए । नोमुरा सेक्युरिटिजका रणनीतिकार वातारु आकियामाले भने, ‘राम्रो वा नराम्रो जे भए पनि, बजारको यो बढोत्तरी केही सीमित स्टकहरूले मात्रै डोर्याएका छन् ।’
यसैबीच, अमेरिकी राष्ट्रपति डोनाल्ड ट्रम्पले इरान युद्धमा ‘अनिश्चितकालीन युद्धविराम’ का बारेमा दिएको टिप्पणीले लगानीकर्ताको मनोबलमा केही सुधार ल्याएको थियो, जसको प्रभाव बुधबारको न्यूयोर्क र टोकियो बजारमा देखिएको थियो । तर, ६० हजारको विन्दु नाघेपछि ‘प्रोग्राम सेलिङ’ (स्वचालित बिक्री) सुरु हुँदा र बजार अत्यधिक बढेको आशंकाले लगानीकर्ता सतर्क बन्दा अन्ततः सूचक ओरालो लाग्यो ।
यसअघि फेब्रुअरीमा प्रधानमन्त्री सानाए ताकाइचीको नेतृत्वमा लिबरल डेमोक्रेटिक पार्टीले निर्वाचनमा भारी बहुमत प्राप्त गरेपछि पनि निक्केई ६० हजार नजिक पुगेको थियो। तर, मध्यपूर्वको युद्धका कारण तेल आयातकर्ता मुलुक जापानको बजार ५०,५०० को विन्दुसम्म झरेको थियो । गत हप्तादेखि पुनः लय समातेको बजारले बुधबारको रेकर्ड तोड्दै बिहीबार ऐतिहासिक विन्दु चुमेको हो ।
