काठमाडौं – जापानले एक नयाँ व्यापार सम्झौता अन्तर्गत ८ अर्ब डलर बराबरको अमेरिकी कृषि तथा खाद्य उत्पादनहरू खरिद गर्ने भएको छ । ह्वाइट हाउसले बुधबार दिएको जानकारी अनुसार यसमा मकै, भटमास, मल र जैविक इन्धन (बायोइथानोल) जस्ता वस्तुहरू समावेश छन् । अमेरिका र जापानबीच यो सम्झौतामा सहमति जुटेको एक दिनपछि ह्वाइट हाउसले यसका थप विवरणहरू सार्वजनिक गरेको हो ।
यस अनुसार, वासिङ्टनको प्रमुख सहयोगी राष्ट्र जापानले अमेरिकामा निर्मित व्यावसायिक विमानहरूको खरिद पनि बढाउनेछ, जसमा १०० बोइङ विमानहरू समावेश छन् । साथै, वार्षिक रूपमा थप अर्बौं डलर बराबरको रक्षा उपकरण पनि खरिद गर्नेछ । विभिन्न चरणको वार्तापछि, यो सम्झौता मंगलबार टुङ्गिएको हो ।
सम्झौताले आयातित जापानी कार र अन्य वस्तुहरूमा अमेरिकी भन्सार शुल्कलाई १५ प्रतिशतमा झारेको छ । ट्रम्प प्रशासनले देश-विशेषमा लगाउँदै आएको भारी शुल्कमाथिको रोक अगस्ट १ मा समाप्त हुनुअघि यो सम्झौतालाई अन्तिम रूप दिइएको हो । यो सम्झौताको सबैभन्दा ठूलो उपलब्धि जापानले संयुक्त राज्य अमेरिकामा ५५० अर्ब डलर लगानी गर्ने प्रतिबद्धता जनाउनु हो । यो लगानी विशेष गरी अर्धचालक (सेमिकन्डक्टर), औषधि, ऊर्जा पूर्वाधार र महत्वपूर्ण खनिज जस्ता रणनीतिक मानिएका क्षेत्रहरूमा निर्देशित गरिनेछ ।
ह्वाइट हाउसले यस सम्झौतालाई कुनै पनि देशद्वारा सुरक्षित गरिएको सबैभन्दा ठूलो एकल विदेशी लगानी प्रतिबद्धताको रूपमा प्रस्तुत गरेको छ । यसलाई ‘अमेरिका-जापान आर्थिक सम्बन्धको रणनीतिक पुनर्संरचना’ भन्दै यसले दुवै देशको साझा हितलाई अगाडि बढाउने विश्वास व्यक्त गरिएको छ ।
सम्झौताको एक अंशको रूपमा, जापानले विश्व व्यापार संगठनको न्यूनतम पहुँचकोटा प्रणाली अन्तर्गत संयुक्त राज्य अमेरिकाबाट हुने चामलको आयातको हिस्सा विस्तार गर्ने वाचा गरेको छ । विवरण नदिइकन, ह्वाइट हाउसले भनेको छ कि जापानले तत्कालै अमेरिकी चामलको आयात ७५ प्रतिशतले बढाउनेछ र साथमा कोटामा ठूलो विस्तार गरिनेछ ।
हाल, जापानलेको ढाँचा अन्तर्गत वार्षिक रूपमा करिब ७७०,००० टन शुल्क-रहित चामल आयात गर्दछ । जसमा संयुक्त राज्य अमेरिका सबैभन्दा ठूलो निर्यातक हो र उसले कुलको लगभग आधा हिस्सा ओगटेको छ । त्यसपछि थाइल्याण्ड र अष्ट्रेलिया छन् ।
