पत्रकार थापाका हत्या आरोपीलाई थप १२ दिन थुनामा राख्न आदेश

दैलेख- पत्रकार डेकेन्द्र थापाको हत्या आरोपमा पक्राउ परेका पाँच अभियुक्तलाई जिल्ला अदालत दैलेखले थप अनुसन्धानका लागि १२ दिन म्याद थपेको छ ।

सर्वोच्चले हत्याको अनुसन्धान नरोक्न आदेश दिए लगत्तै दैलेख जिल्ला अदालतले आज थप अनुसन्धानका लागि तेस्रो पटक म्याद थप गरेको हो ।

यसअघि दुईपटक म्याद थपगरिए पनि प्रधानमन्त्री बाबुराम भट्टराई र महान्यायाधिवक्ता मुक्ति प्रधानले अनुसन्धान रोक्न आदेश दिँदै पत्र लेखेपछि अभियुक्तको बयान हुन सकेको थिएन ।

दुईपटक दिएको समय सकिएपछि प्रहरीले लक्षीराम घर्तीसहितका ५ जनालाई अदालतमा उपस्थित गराएको थियो । पत्रकार थापाको २०६१ साउन २७ गते  माओवादीबाट हत्या भएको थियो । ***