समाचार सुन्नुहोस :
काठमाडौँ – अमेरिकाले क्यानडामा सन् २०२३ मा सिख पृथकतावादी नेता हरदीप सिंह निज्जरको हत्या गराएको आरोपमा भारतीय आपराधिक गिरोहका प्रमुख लरेन्स बिश्नोई र उनका सहयोगी सतिन्दरजीत सिंह ‘गोल्डी बरार’विरुद्ध अभियोग दर्ता गरेको छ। लस एन्जलसस्थित संघीय अदालतमा दर्ता गरिएको अभियोगमा दुवैले क्यानडाको ब्रिटिस कोलम्बियास्थित सरेमा रहेको गुरुद्वाराबाहिर निज्जरको हत्या गराउने योजना बनाएको उल्लेख छ।
अभियोगपत्रअनुसार बिश्नोईले भारतको जेलभित्रबाट मोबाइल फोन प्रयोग गरी हत्या अभियान सञ्चालन गरेका थिए भने गोल्डी बरारले उत्तर अमेरिकामा गिरोहको गतिविधि समन्वय गरेका थिए। निज्जरको हत्यापछि क्यानडा र भारतबीच कूटनीतिक तनाव चुलिएको थियो। क्यानडाले भारतीय सरकारी एजेन्टको सम्भावित संलग्नताबारे अनुसन्धान गरेको बताए पनि भारतले आरोप अस्वीकार गर्दै आएको छ। अमेरिकाले दर्ता गरेको नयाँ अभियोगमा भने भारतीय सरकारको संलग्नता रहेको कुनै आरोप लगाइएको छैन।
यो मुद्दा अमेरिका र क्यानडाले संयुक्त रूपमा सञ्चालन गरिरहेको सङ्गठित अपराधसम्बन्धी अनुसन्धानको एक हिस्सा हो, जसअन्तर्गत ३७ जनाविरुद्ध विभिन्न अभियोग दर्ता भइसकेका छन्।
