समाचार सुन्नुहोस :
काठमाडौँ – बंगलादेशको राजधानी ढाकाको मीरपुरस्थित एक कपडा कारखानामा लागेको भीषण आगलागीमा कम्तीमा १६ जनाको मृत्यु भएको छ। अधिकारीहरूले मृतक संख्या अझ बढ्न सक्ने बताएका छन्। फायर सर्भिसका अनुसार जलेर पहिचान गर्न नसकिने अवस्थामा १६ वटा शव फेला परेका छन्। मंगलबार चार तले कारखानामा आगो लागेको थियो। आगो नियन्त्रणमा आएपछि आफन्तहरू बेपत्ता आफ्ना परिवारजनको खोजीमा शोकाकुल हुँदै घटनास्थलमा पुगेका थिए।
तीन घण्टाको प्रयासपछि मुख्य आगो निभाइएको भए पनि छेउमा रहेको रसायन गोदाममा अझै आगो बलिरहेको फायर सर्भिसले जनाएको छ। गोदाममा ब्लीचिङ पाउडर, प्लास्टिक र हाइड्रोजन पेरोक्साइड जस्ता अत्यन्तै ज्वलनशील पदार्थहरू राखिएका थिए। फायर सर्भिसका निर्देशक मोहम्मद ताजुल इस्लाम चौधरीका अनुसार पीडितहरू विषालु ग्यासका कारण तुरुन्तै मरेको हुनसक्छ। प्रहरीले कारखाना र गोदामका मालिकहरूको खोजी थालेको छ।
बंगलादेशमा कमजोर सुरक्षा मापदण्ड र पूर्वाधारका कारण यस्ता आगलागीका घटना बारम्बार हुने गरेका छन्। सन् २०१३ मा ढाकामै भवन भत्किँदा १,१०० भन्दा बढीको मृत्यु भएको थियो, जसलाई देशको सबैभन्दा ठूलो औद्योगिक दुर्घटना मानिन्छ।
