काठमाडौं – एसीसी इमर्जिङ कप क्रिकेटमा लगातार दोस्रो हारसँगै नेपाल समूह चरणबाटै बाहिरिएको छ । सोमबार पाकिस्तानसँग ६ विकेटले पराजित भएको नेपाल आज बंगलादेशसँग ८३ रनको हार व्यहोर्दै समूह चरणबाटै बाहिरिएको हो ।
इमर्जिङ टिम्स एशिया कप क्रिकेट अन्तरगत आज को खेलमा नेपाल बंगलादेशसँग ८३ रनले पराजित भएको छ । २ सय ५८ रनको लक्ष्य पछ्याएको नेपालले ४२ ओभर ३ बलमा सबै विकेट गुमाउँदा १ सय ७४ रन मात्र बनाउन सक्यो । नेपालका दिपेन्द्र सिंह ऐरीले भने अर्धसतक बनाएका थिए । ६ चौकाको मद्धतमा उनले ८५ बलमा ५६ रन बनाएका हुन् । १० बल खेलेका कप्तान ज्ञानेन्द्र मल्ल खाता नखोली आउट भए । १३ बल खेलेका अर्का ओपनर सुनिल धमला पनि एक रनमै आउट भएका थिए ।
यस्तै आशिफ शेखले १५ बलमा १२ रन बनाए । धरमराएको नेपाली ब्याटिङ दिलिप नाथ र दिपेन्द्र सिंह ऐरीले सम्हालेका थिए । ६२ बलमा ४१ रन बनाउँदा दिलिप आउट भएपछि ब्याटिङ सम्हालिन सकेन । त्यसपछि शरद भेषावकर ५ बलमा २ रन बनाएर आउट भए । लगत्तै मेहबुब आलम १७ बलमा १० रन बनाएर आउट भए । बिनोद भण्डारीले एक छक्का, ६ चौकाको मद्धतमा २३ बलमा ३३ रन बनाए । यस्तै भुवन कार्की १६ बलमा ६ रन बनाएर आउट भए ।
नेपालले टस जितेर पहिला फिल्डिङ गर्ने निर्णय गरेपछि ब्याटिङमा आएको बंगलादेशले निर्धा्रित ५० ओभरमा ९ विकेट गुमाएर २ सय ५७ रन बनाएको थियो । नेपालका अभिनाश कर्णले ३ तथा सन्दिप लामिछानेले २ विकेट लिए । यस्तै मेहबुब आलम, दिपेन्द्र सिंह ऐरी र ज्ञानेन्द्र मल्लले एक एक विकेट लिए । एसियाली क्रिकेट परिषद एसिसीको आयोजनामा भइरहेको प्रतियोगितामा चार एशोसिएट राष्ट्र नेपालसँगै अफगानिस्तान, मलेसिया र हङकङ तथा टेष्ट मान्यताप्राप्त राष्ट्र पाकिस्तान, भारत, बंगलादेश र श्रीलंकाका २३ वर्षमुनिका खेलाडीको सहभागिता छ ।
नियमित कप्तान पारस खड्का यस प्रतियोगितामा अनुपस्थित छन् । प्रमुख तीन बलर शक्ति गौचन, सोमपाल कामी र बसन्त रेग्मी पनि टिममा छैनन् । नेपाल रहेको समूह ‘ए’ मा पाकिस्तान, बंगलादेश र हङकङ तथा समूह ‘बी’ मा भारत, श्रीलंका, मलेसिया र हङकङ छन् ।
