टोकियो – जापानको दक्षिणपश्चिमी क्युसु क्षेत्रमा बिहीबार दिउँसो भारी वर्षाका कारण सिन्कान्सेन बुलेट ट्रेन सेवा अस्थायी रूपमा निलम्बित भएको छ । आँधीका कारण उत्पन्न भएको भीषण वर्षाले गर्दा सेवा अवरुद्ध भएको रेल सञ्चालकले जनाएका छन् ।
जापान मौसम विज्ञान एजेन्सीका अनुसार, ‘लिङ्लिङ’ नामक टाइफुन (आँधी) बिहीबार साँझ ५ बजेतिर कागोशिमा प्रान्तमा प्रवेश गरेको थियो । यस वर्षको यो १२औं टाइफुन हो ।
रेल सञ्चालक जेआर क्युसुले दिएको जानकारीअनुसार, क्युसु सिन्कान्सेन लाइनको कुमामोतो र कागोशिमा-चुओ स्टेसन बीचको सेवा दिउँसो २:१० बजेदेखि करिब एक घण्टा र त्यसपछि अपराह्न ४:३५ बजेदेखि करिब ९० मिनेटसम्म रोकिएको थियो ।
यो आँधी त्यस क्षेत्रमा हालैका हप्ताहरूमा भएको मुसलधारे वर्षापछि आएको हो । पछिल्लो वर्षाले गर्दा आएको बाढी र पहिरोले त्यस क्षेत्रमा धनजनको क्षति पुर्याएको थियो । अधिकारीहरूले भारी वर्षाका कारण थप विपत्ति आउन सक्ने भन्दै उच्च सतर्कता अपनाउन आग्रह गरेका छन् ।
