टोकियो – जापानमा बलात्कारको विषयमा निकै कम महिलाहरूले मात्र खुलेर बोल्ने गर्छन् । यो वास्तविकताकाबीच एक अभियोजक ‘हिकारी’ (परिवर्तित नाम) पनि आफ्ना तत्कालीन हाकिम, ओसाकाका पूर्व प्रमुख अभियोजकद्वारा भएको भनिएको यौन हमलाको बारेमा वर्षौंसम्म चुप रहिन् । यद्यपि, हिकारीले अन्ततः यो कदम चाल्ने आँट गरिन्, जसको लागि उनले आफ्नो अभियोजकको जागिर र व्यक्तिगत जीवनमा ठूलो मूल्य चुकाउनुपरेको छ ।
तर, उनलाई यसमा कुनै पछुतो छैन । ‘त्यो हमलापछि मेरो जीवन नै रोकिएको छ,’ हिकारीले एएफपीलाई एक भावुक अन्तर्वार्तामा भनिन्, ‘मेरो श्रीमान् अस्ति भित्तामा मुक्का हान्दै यस्तो स्वरमा रुँदै हुनुहुन्थ्यो जुन मैले जीवनमा कहिल्यै सुनेकी थिइनँ, उहाँले अब यो सब सहन नसक्ने बताउनुभयो ।’
हिकारीले सन् २०१८ मा कार्यालयको एक पार्टीपछि तत्कालीन ओसाका जिल्ला सरकारी अभियोजक कार्यालयका प्रमुख केन्तारो कितागावाले आफूलाई बलात्कार गरेको आरोप लगाएकी छन् । कितागावालाई जुन २०२४ मा मात्र पक्राउ गरी मुद्दा चलाइएको थियो र उनको नाम सार्वजनिक गरिएको थियो ।
अक्टोबरमा भएको प्रारम्भिक सुनुवाइमा कितागावाले ‘मुद्दामा लड्ने कुनै मनसाय नभएको’ र ‘पीडितलाई गम्भीर र ठूलो चोट पुऱ्याएकोमा’ माफी मागेका थिए । तर, डिसेम्बरमा उनको वकिलले पत्रकारहरूलाई बताए कि कितागावाले ‘हिकारी प्रतिरोध गर्न असमर्थ थिइन् भन्ने कुरा स्वीकार नगरेको… र उनले सहमति दिएको विश्वास गरेको’ बताएपछि उनको बोली फेरिएको थियो । एक सञ्चारमाध्यमका अनुसार, हिकारीले पत्रकार सम्मेलन गरेर अभियोजन पक्षले अनुसन्धानको जानकारी चुहाएको आरोप लगाएपछि कितागावाले आफ्नो मनसाय बदलेका थिए ।
मारिन सक्छु भन्ने डरले मैले प्रतिरोध गर्न सकिनँ
हिकारीका अनुसार उनी कडा रक्सी पिउन अभ्यस्त थिइनन् र कार्यालयको जमघटको बीचमै उनले होस गुमाएकी थिइन् । उनका सहकर्मीहरूले अभियोजकहरूलाई बताएअनुसार, उनी घर जान ट्याक्सीमा चढेकी थिइन् तर कितागावाले आफूलाई जबरजस्ती गाडीभित्र हुले । त्यसपछि आफूले होस पाउँदा कितागावाको घरमा बलात्कृत भइरहेको अवस्थामा पाएको उनले बताइन् । ‘यो एउटा भयानक सपनाजस्तै थियो,’ हिकारीले भनिन्, ‘मलाई मारिन सक्छु भन्ने डरले मैले प्रतिरोध गर्न सकिनँ ।’
घटनापछि आफू चुप बसेको हिकारीले बताइन् । कितागावाले यो कुरा सार्वजनिक नगर्न बिन्ती गरेका थिए, किनकि यसले अभियोजक कार्यालयका लागि ठूलो बदनामी हुनेछ भनेर उनले बताए र आत्महत्या गर्ने धम्कीसमेत दिएका थिए । घटनाको करिब एक वर्षपछि कितागावाले अवकाश लिए, तर हिकारीलाई लाग्यो कि उनको अझै पनि केही अधिकारीहरूमाथि प्रभाव छ र उनको करियरलाई हानि पुऱ्याउन सक्छन् । ‘उनी निकै प्रभावशाली र शक्तिशाली व्यक्ति थिए, त्यसैले मैले हमलाको बारेमा गुनासो गरेँ भने कसैले मेरो कुरा सुन्दैन कि भन्ने डर थियो,’ उनले भनिन् ।
यो पीडाले उनलाई भित्रभित्रै खाइरहेको थियो । अन्ततः, पोस्ट-ट्रमाटिक स्ट्रेस डिसअर्डर (PTSD) को निदान भएपछि र कामबाट बिदा लिएपछि, उनले २०२४ मा मुद्दा दायर गरिन् । ‘बाँच्नका लागि, आफ्नो परिवारसँग शान्तिपूर्ण जीवनमा फर्कनका लागि, र एक अभियोजकको रूपमा आफ्नो काममा फर्कनका लागि, मैले (कितागावा) लाई न्यायको कठघरामा ल्याउन आवश्यक महसुस गरेँ,’ उनले भनिन्, ‘म केवल सुरक्षित वातावरणमा काम गर्न चाहन्छु… म काममार्फत पीडितहरूलाई बचाउन चाहन्छु ।’
उनी सेप्टेम्बरमा काममा फर्किइन्, तर त्यहाँ उनको बारेमा द्वेषपूर्ण अफवाहहरू फैलिएको पाइन् । उनको नाम सार्वजनिक नगरिए पनि उनलाई पीडितको रूपमा पहिचान गर्ने, उनी कितागावाप्रति आकर्षित भएको, यौनसम्पर्कका लागि सहमति दिएको र मातेको नभएको जस्ता कुराहरू समावेश थिए । हिकारीलाई लाग्छ कि यी अफवाहहरू कितागावाका नजिकका मानिसहरूले फैलाएका हुन् । त्यसबेलादेखि उनी बिदामा छिन् । एक सन्तानकी आमा हिकारीका श्रीमान् उनको सबैभन्दा ठूलो समर्थक भएको तर ‘मलाई कसरी बचाउने भनेर उनी आफै सङ्घर्ष गरिरहेको’ उनले बताइन् ।
जापानमा यौन हिंसाको अवस्था
जापान सरकारको पछिल्लो तथ्याङ्कअनुसार, ८.१ प्रतिशत जापानी महिला, अर्थात् हरेक १२.५ मध्ये एक जना, बिना-सहमति यौनसम्पर्कको शिकार भएका छन् । केवल १.५ प्रतिशतले मात्र प्रहरीलाई सम्पर्क गरे भने ५५.४ प्रतिशत चुपचाप बसे । यद्यपि, सेइसेन विश्वविद्यालयकी प्राध्यापक काओरी ओकामोटोका अनुसार अब ‘यौन हिंसाको बारेमा कुरा गर्नु ठीक छ भन्ने विचार फैलिरहेको छ ।’
पीडितहरूलाई मद्दत गर्दै आएकी क्लिनिकल मनोवैज्ञानिक ओकामोटोले सहायता केन्द्रहरूमा परामर्श लिनेहरूको संख्या पनि बढिरहेको बताइन् । सन् २०१७ मा बलात्कारको परिभाषा फराकिलो बनाइएको थियो भने २०२३ मा पीडितले हिंसा वा धम्की प्रमाणित गर्नुपर्ने आवश्यकता हटाइएको थियो। यसले पीडितहरूलाई अगाडि आउन मद्दत गरेको छ ।
हिकारीका अनुसार जापानी कानुनी क्षेत्रमा यौन उत्पीडन ‘व्याप्त’ छ । सार्वजनिक अभिलेखअनुसार, विगत १६ वर्षमा अभियोजक कार्यालयहरूमा २१ जनालाई यौन हिंसाको लागि अनुशासनात्मक कारबाही गरिएको छ । हिकारीका समर्थकहरूले जनवरीमा सरकारसमक्ष कितागावालाई लामो जेल सजाय र सहायक अभियोजकलाई कडा सजायको माग गर्दै एक याचिका पेस गरेका छन्, जसमा ६८ हजारभन्दा बढी हस्ताक्षरहरू छन् ।
‘म अझै पनि सार्वजनिक रूपमा बोल्नुको कारण यो हो कि म भन्न चाहन्छु पीडितहरूको गल्ती हुँदैन,’ हिकारीले भनिन्, ‘म तपाईंहरूको अनुहार चिन्दिनँ, तर कम्तिमा म तपाईंहरूको साथमा छु भन्न चाहन्छु ।’
