टोकियो – विश्वव्यापी आर्थिक मन्दीको चिन्ता बढ्दै गएका बेला, जापानमा सुनमा लगानी गर्ने प्रवृत्ति तीव्र रूपमा बढेको छ । अमेरिकी राष्ट्रपति डोनाल्ड ट्रम्पद्वारा लगाइएको ठूलो मात्राको भन्सार शुल्कले अन्तर्राष्ट्रिय बजारमा उत्पन्न अस्थिरतापछि, लगानीकर्ताहरू सम्भावित जोखिमका बेला मूल्य नघट्ने सुरक्षित सम्पत्तिको खोजीमा सुनतर्फ आकर्षित भएका हुन् ।
टोकियोस्थित तानाका प्रिसियस मेटल टेक्नोलोजी कम्पनीले निर्धारण गर्ने सुनको मापदण्ड मूल्य (बेंचमार्क प्राइस) अप्रिल २२ मा येनमा अहिलेसम्मकै उच्च स्तरमा पुगेको थियो । मूल्य १७ हजार येन ($११५) नाघेको छ, जुन राष्ट्रपति ट्रम्पले जनवरी २० मा कार्यभार सम्हालेयता तीन महिनामा करिब १५ प्रतिशतको वृद्धिलाई देखाउँछ ।
सुनको मूल्यसँग जोडिएका लगानी कोषहरू पनि जापानको निजी लगानीकर्ताका लागि कर छुट कार्यक्रम (निप्पोन इन्डिभिजुअल सेभिङ्स अकाउन्ट ニーサ) अन्तर्गत लोकप्रिय बन्दै गएका छन् । साथै, अधिक व्यक्तिहरूले शुद्ध सुनमा मासिक लगानी गर्न थालिरहेका छन् ।
मित्सुबिशी यूएफजे फाइन गोल्ड फन्डमा मार्च महिनामा मात्र १९.२ अर्ब येनको लगानी प्रवाह भएको थियो, जुन गत डिसेम्बरको तुलनामा करिब २.६ गुणा बढी हो । यो फन्ड गत डिसेम्बरमा पेइपेय सेक्युरिटिज कर्पोरेसन PayPay Securities Corp. द्वारा निशा कार्यक्रमअन्तर्गत चौथो स्थानमा थियो, तर फेब्रुअरीमा शीर्ष स्थानमा पुग्यो र मार्चमा दोस्रो स्थानमा रह्यो ।
तानाका प्रिसियस मेटलका अनुसार, सुनको बुलियन र सिक्का किन्ने मानिसहरूको संख्या बढेको छ । मासिक दरमा शुद्ध सुनमा लगानी गर्ने सदस्यहरूको संख्या पनि जनवरीदेखि अप्रिल अवधिमा अघिल्लो वर्षको तुलनामा २६ प्रतिशतले वृद्धि भएको बताइएको छ ।
कोमेह्यो कम्पनीजस्ता ठूला दोश्रोहात लक्जरी ब्रान्ड पसलहरूमा प्रयोग गरिएका सुनका गहनाहरूको बिक्री पनि उल्लेखनीय रूपमा बढेको छ । मार्च महिनामा सुनका गहनासहितका उत्पादनहरूको बिक्री अघिल्लो वर्षको तुलनामा ३० प्रतिशतले बढेको हो । टोकियोको शिनजुकु क्षेत्रमा रहेको कोमेह्योको एक शाखामा सुनका हार, लकेट लगायतका विविध गहनाहरू बिक्री हुन्छन्, जसको मूल्य सयौँ हजारदेखि लाखौँ येन सम्म पर्छ । ‘यी गहनाहरू मुख्यतः ३० देखि ४० वर्ष उमेर समूहका ग्राहकहरूले किन्ने गर्छन्,’ स्टोरका बिक्री प्रबन्धकले भने ।
यद्यपि सुन पनि अन्य सम्पत्तिहरूझैँ मूल्य घट्ने जोखिमयुक्त सम्पत्ति हो, तर पछिल्लो समय शेयर बजार अत्यधिक अस्थिर हुँदा सुनको मूल्य स्थिर देखिएको छ । अप्रिल ७ मा निक्केई सूचकांक इतिहासकै तेस्रो ठूलो अंक गिरावटमा परेको थियो । बुलियनभल्ट (BullionVault) का जापानी बजार प्रमुख अत्सुको साटो ह्वाइटहाउसका अनुसार, ‘शेयर बजारमा देखिएको अस्थिरतालाई हेर्दा, सुन लगानीका लागि अझै पनि आकर्षक गन्तव्यका रूपमा रहिरहेको छ ।’
