काठमाडौं – जापानका लागि स्पेन विरुद्धको जित ‘फूटबल चमत्कार’ का रुपमा सावित भएको छ । जुन चमत्कार विश्वका धेरै फूटबलप्रेमीले अझै पत्याउन सकेका छैनन् ।
समूह चरणको अघिल्लो खेलमा कोस्टारिकासँग हार बेहोरेपछि धेरैजसो जापानी फूटबलप्रेमीले कतार विश्वकपबाटै बाहिरिने आकलन गर्न थालेका थिए । तर, खलिफा अन्तर्राष्ट्रिय रङ्गशालामा मंसीर १५ गते राति भएको खेलमा सन् २०१० को विश्वकप विजेता स्पेनलाई २-१ ले पराजित गर्दै जापान अन्तिम १६ मा पुगेको छ । आगामी खेलमा जापानले सन् २०१८ को उपविजेता टोली क्रोएसियासँग प्रतिस्पर्धा गर्नेछ ।
जापानको जितलाई कतिपय खेलकूद विश्लेषकले भाग्यले साथ दिएको भनिरहेका छन् । कतिपयले जापानको दोस्रो गोललाई विवादका रूपमा लिइरहेका छन् । अन्तर्राष्ट्रिय सञ्चार माध्यम रोयटर्सले स्पेनले लापरबाहीकै कारण जापानसँग हार बेहोर्नुपरेको विश्लेषण गरेको छ । स्पेनले जापानसँगको खेललाई सामान्य रूपमा लिएको देखिएको थियो। त्यसैको फाइदा उठाउँदै जापानले समूह चरण पार गरेको छ ।
स्पेनका लागि अलभारो मोराटाले पहिलो हाफको ११ मिनेटमै गोल गरेका थिए। त्यो समयमा जापानलाई पराजित गर्न स्पेनले पर्याप्त मौका पाएको थियो । फूटबलको विश्लेषण र तथ्याङ्क राख्ने ओप्टाका अनुसार, रोड्री (११५) र पाउ तोरेस फरान टोरेस (१०९)ले खेलको पहिलो हाफमा धेरै पास गरेका थिए, जुन जापानको पूरै टीमले ८९ पटक मात्र गरेको थियो ।
स्पेनका लागि जापान विरुद्धको एक गोलको अग्रता काफी नै थियो, तर स्पेन खासै रक्षात्मक देखिएन। यही कमजोरीका कारण जापानी खेलाडी रित्सु डोन र काओरु मितोमाले ६ मिनेटमै खेललाई उल्टाए। यसैबाट जापान समूह ‘ई’ को पहिलो स्थानमा पुग्यो । यो जितसँगै जापान समूह विजेता बन्दै नकआउट चरणमा पुगेको छ । यही समूहमा रहेको जर्मनी कोस्टारिकासँगै विश्वकपबाट बाहिरिएको छ ।
द एथ्लेटिकका अनुसार, सन् १९९८ देखि २०१० सम्म जापानको विश्वकप टीममा पाँच जनाभन्दा बढी विदेशमा खेल खेलेका खेलाडी नै थिएनन् । सन् २०१४ मा भने विदेशी क्लबमा खेल्ने खेलाडी १२ जना पुगेका थिए । त्यस वेलादेखि जापानले खेलमा राम्रो गरिरहेको छ। विश्वका उत्कृष्ट फूटबल लिगले यसबारे मनन गरिरहेका छन् ।
जर्मनीसँगको जितपछि जापानी टोलीले जित्नका लागि जे पनि गर्न सक्ने सन्देश दिएको थियो । जापानी खेलाडीले धेरै रणनीतिक ‘फाउल’ खेलेका थिए । जापानको १४ र जर्मनीको ६ ‘फाउल’ ले के देखाउँछन् भने जापान पहिलो हाफमा जे आवश्यक छ, त्यही गर्ने र दोस्रो हाफमा भने प्रशिक्षक मोरियासुले बनाएको योजना कार्यान्वयनमा लाग्छ । –हिमालखबरबाट
