समाचार सुन्नुहोस :
काठमाडौँ – रुसले आफ्नो भेनेरा–डी अन्तरग्रहीय मिशनमार्फत सन् २०३६ भन्दा पहिले शुक्र ग्रह भ्रमण गर्ने योजना बनाएको छ। स्थानीय मिडियाका अनुसार तयारी कार्यहरू यसका लागि सुरु भइसकेको छ।
यो परियोजना अब देशको नयाँ राष्ट्रिय अन्तरिक्ष कार्यक्रमको हिस्सा हो। स्पेस रिसर्च इन्स्टिच्युट (आइकेआई) का ग्रह भौतिक विज्ञान विभाग प्रमुख ओलेग कोराबलेभका अनुसार प्रारम्भिक डिजाइन कार्य सन् २०२६ जनवरीदेखि सुरु हुनेछ। डिजाइन मस्यौदा तयार गर्न करिब दुई वर्ष लाग्ने अनुमान गरिएको छ। यस अवधिमा विभिन्न समन्वय बैठकहरू हुनेछन् र लाभोच्किन एसोसिएसनसहित रुसी अन्तरिक्ष उद्योगका अन्य संस्थासँग सहकार्य गरेर प्रगति अघि बढाइने कोराबलेभले बताए।
डिजाइन चरण सकिएपछि प्रक्षेपणको मिति तय गरिनेछ। उनले भने, “यो योजना सन् २०३६ भन्दा पछि हुनेछैन।” भेनेरा–डी मिशनमा ल्यान्डर, बेलुन प्रोब र कक्षीय अन्तरिक्ष यान रहनेछ। यस वर्षको सुरुवातमा आइकेआईका वैज्ञानिक निर्देशक लेभ जेलेनीले पनि यो मिशन सन् २०३४ वा २०३५ भन्दा पहिले प्रक्षेपण हुने सम्भावना कम रहेको बताएका थिए।
