मोहन बस्नेतको सांसद पद निलम्बन हुने

समाचार सुन्नुहोस : 

काठमाडौँ – प्रतिनिधिसभा सदस्य मोहनबहादुर बस्नेत सांसद पदबाट निलम्बित हुने भएका छन्। सिन्धुपाल्चोक क्षेत्र नं. २ बाट प्रतिनिधित्व गर्ने बस्नेतविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचारसम्बन्धी मुद्दा दायर गरेसँगै उनको पद निलम्बन हुने भएको हो ।

अब बस्नेतले संघीय संसद् तथा त्यसका विभिन्न समितिहरूका बैठकमा सहभागी हुन पाउने छैनन्। साथै, उनको तलब, भत्ता लगायतका सुविधा समेत रोक्का गरिनेछ।

अख्तियारले बस्नेतसहित १६ जना व्यक्तिहरू र दुईवटा कम्पनीविरुद्ध झन्डै ३ अर्ब ३१ करोड रुपैयाँभन्दा बढीको भ्रष्टाचार गरेको अभियोगसहित मुद्दा दर्ता गरेको हो। भ्रष्टाचार निवारण ऐनको दफा ३३ मा भ्रष्टाचार मुद्दा दायर भएसँगै सांसद पद निलम्बन हुने व्यवस्था छ ।