काठमाडौं– चार वर्षअघि नेपालमा फेसबुक प्रयोग गरेर हौस्याएका प्रधानमन्त्री डा. बाबुराम भट्टराई अहिले भने सामाजिक सञ्जालसँगै डराएका छन् ।विज्ञान तथा प्रविधि मन्त्रालयमा भएको छलफलमा प्रधानमन्त्री भट्टराईले फेसबुक र ट्विटरले सामाजिक सदभावमा खलल पुर्याएको बताए ।
‘इन्टरनेटको प्रयोग, अझ विशेष गरी सामाजिक सञ्जालको प्रयोगबाट हुने गरेका सामाजिक शिष्टाचार, नैतिकता र सार्वजनिक सदभावमा खलल पुर्याउने, सामाजिक द्वेष र आतंक फैलाउने तथा राष्ट्रिय अस्मिता र स्वाभिमानविरुद्धका सामाग्रीको प्रसारणजस्ता विषय’लाई प्रधानमन्त्रीले विद्युतीय कारोबारसम्बन्धि कार्यक्रममा अघि सारेका हुन् ।
सामाजिक सञ्जालबारे सरकारको यो तहबाट सम्भवतः पहिलोपटक असन्तुष्टि प्रकट भएको हो । पछिल्लो दिनमा नेपालमा फेसबुक, ट्विटरजस्ता सामाजिक सञ्जालका प्रयोगकर्ता बढिरहेका छन् ।
