टोकियो – न्युयोर्कस्थित विश्वप्रसिद्ध ‘मेट्रोपोलिटन म्युजियम अफ आर्ट’ (मेट)ले जापानी फेसन डिजाइनर तामाई हिरोकावाका अद्वितीय डिजाइनहरूलाई आफ्नो स्थायी संग्रहमा समावेश गर्ने भएको छ । ‘छाला’को अवधारणामा आधारित रहेर ‘सिमलेस निटवेयर’ सिर्जना गर्न प्रख्यात हिरोकावाका कलाकृतिहरू अब विश्वकै ठूलो फेसन संग्रहको हिस्सा बन्नेछन् ।
यस ऐतिहासिक उपलब्धिपछि हिरोकावा इत्से मियाके, रेई कावाकुबो र हानाए मोरी जस्ता दिग्गज जापानी डिजाइनरहरूको सूचीमा सामेल भएकी छिन्, जसका कामहरू मेट म्युजियमको ‘कस्ट्युम इन्स्टिच्युट’ मा सुरक्षित राखिएका छन् ।
म्युजियमले हिरोकावाको चर्चित ‘स्किन सिरिज’ बाट सातवटा बडीसुटहरू छनोट गरेको छ । यी वस्त्रहरूलाई डिजाइनरले मानव शरीरको ‘दोस्रो छाला’ का रूपमा चित्रण गरेकी छिन् । आगामी आइतबारदेखि सर्वसाधारणका लागि खुल्ने ‘वसन्त २०२६ कस्ट्युम आर्ट’ प्रदर्शनीमा यी सामग्रीहरू प्रदर्शन गरिनेछ । म्युजियमका अनुसार यो प्रदर्शनीले लुगा र शरीरबीचको अन्तर्निहित सम्बन्धलाई उजागर गर्नेछ ।
कस्ट्युम इन्स्टिच्युटका क्युरेटर एन्ड्रिउ बोल्टनले हिरोकावाको कामलाई ‘असाधारण’ भन्दै प्रशंसा गरेका छन् । उनले भने, ‘हिरोकावाले शरीरलाई प्रतीकात्मक स्तरमा मात्र प्रस्तुत गर्दिनन्, उनले फेसनको शिल्पलाई अगाडि बढाउन अत्याधुनिक प्रविधिको प्रयोग समेत गर्छिन् ।’
आफ्नो काम मेट म्युजियममा राखिनुलाई हिरोकावाले ठूलो सम्मानको रूपमा लिएकी छिन् । उनले भनिन्, ‘आफ्ना सिर्जनाहरू युगौंसम्म सुरक्षित रहने र भविष्यका पुस्ताले हेर्न पाउने अवसर पाउनु मेरा लागि गर्वको विषय हो ।’
कानागावा प्रान्तको फुजिसावामा जन्मिएकी हिरोकावा टोकियोको बुन्का फेसन कलेजकी स्नातक हुन् । उनले प्रसिद्ध डिजाइनर इत्से मियाकेको मातहतमा फेसनको तालिम लिएकी थिइन् र सन् २००६ मा आफ्नै ब्रान्ड ‘सोमार्ता’ सुरु गरिन् ।
हिरोकावाका डिजाइनहरू विश्वचर्चित पप गायिका लेडी गागाले समेत लगाएकी छिन् । यसका साथै, सन् २०२१ को टोकियो ओलम्पिक र प्यारालिम्पिकमा पदक जित्ने जापानी खेलाडीहरूले लगाएका ज्याकेटहरू पनि उनैले डिजाइन गरेकी थिइन् ।
