टोकियो— सहपाठीमाथि विद्यार्थीहरूले आक्रमण गरिरहेका भिडियोहरू सामाजिक सञ्जालमा भाइरल भएपछि जापानमा बुलिङको गम्भीर र नयाँ स्वरूप उजागर भएको छ । घटनाहरूले प्रहरी अनुसन्धान, विद्यालय हस्तक्षेप र अनलाइन दुव्र्यवहार बढाएको छ ।
जनवरीमा तोचिगीस्थित एक सरकारी उच्च विद्यालयमा एक विद्यार्थीले अर्कोलाई कुटपिट गरेको भिडियो सार्वजनिक भएपछि सम्बन्धित विद्यार्थीलाई शारीरिक चोट पुर्याएको आशंकामा पारिवारिक अदालतमा पठाइएको छ ।
ओइता शहरमा पनि विद्यार्थीहरूबीच कुटाकुट भएका भिडियोहरू फैलिएका छन्, जसलाई शिक्षा बोर्डले “गम्भीर बुलिङ घटना” का रूपमा वर्गीकृत गरेको छ ।
तोचिगीको एक भिडियोमा विद्यालयको शौचालयभित्र एक विद्यार्थीलाई समूहले घेरेर कुटपिट गरेको दृश्य देखिन्छ । डिसेम्बरमा खिचिएको उक्त भिडियो छोटो समयमै १० करोडभन्दा बढी पटक हेरिएको थियो ।
शिक्षकहरू घटनाबारे अनभिज्ञ रहेको जनाइएको छ भने भिडियो भाइरल भएपछि १,५०० भन्दा बढी गुनासा प्राप्त भएका थिए । साथै, सामाजिक सञ्जालमा संलग्नहरूको पहिचान गर्ने प्रयास र धम्कीपूर्ण टिप्पणी बढेपछि केही विद्यालय क्लबहरूले प्रतिस्पर्धाबाट नाम फिर्ता लिएका थिए ।
प्रहरीले फेब्रुअरी ५ मा अनुसन्धान अघि बढाउँदै सम्बन्धित विद्यार्थीलाई अभियोजनकर्तासमक्ष पेश गरेको थियो, जुन मुद्दा मार्च २ मा पारिवारिक अदालतमा पुगेको हो ।
ओसाकामा पनि एक बालकलाई समुद्रमा धकेलिएको भिडियो सार्वजनिक भएको छ ।
घटनापछि मार्च ३ मा जापानको शिक्षा मन्त्रालयले बुलिङ नियन्त्रण र सूचना नैतिकतासम्बन्धी सामग्री जारी गर्दै विद्यालयहरूलाई प्रयोग गर्न आग्रह गरेको छ ।
विशेषज्ञहरूका अनुसार स्मार्टफोन र सामाजिक सञ्जालको विस्तारसँगै बुलिङ अब बन्द वातावरणबाट बाहिर सार्वजनिक रूपमा देखिन थालेको छ। साथै, यस्ता भिडियो सेयर गर्दा दीर्घकालीन असर पर्न सक्ने चेतावनी पनि दिइएको छ ।
