समाचार सुन्नुहोस :
काठमाडौँ – सभामुख डोलप्रसाद अर्याल निर्वाचित भएपछि बसेको प्रतिनिधिसभा बैठकले सभा सञ्चालनका लागि आवश्यक दुई महत्वपूर्ण समिति गठन गरेको छ। सिंहदरबारस्थित निर्माणाधीन संसद् भवनको बहुउद्देश्यीय हलमा सोमबार बसेको बैठकले २१ सदस्यीय कार्यव्यवस्था परामर्श समिति गठन गरेको हो, जसले कार्यसूची तय गर्ने र बैठक सञ्चालनमा सहजीकरण गर्नेछ। उक्त समिति सभामुखकै अध्यक्षतामा रहनेछ।
यसैगरी, सभा सञ्चालनसम्बन्धी नियमावली तयार गर्न १५ सदस्यीय मस्यौदा समिति पनि गठन गरिएको छ। राष्ट्रिय स्वतन्त्र पार्टीका सांसद गणेश पराजुलीको नेतृत्वमा बनेको उक्त समिति सर्वसम्मत रूपमा अनुमोदित भएको हो। समितिलाई आवश्यक परे विशेषज्ञको सहयोग लिन सक्ने अधिकार दिइएको छ र यसको कार्यअवधि १४ दिन तोकिएको छ।
बैठकले गृहमन्त्री सुदन गुरुङले प्रस्तुत गरेका तीन अध्यादेश सर्वसम्मत रूपमा पारित गरेको छ। साथै, पूर्वसांसद रामचन्द्र भट्टराईप्रति श्रद्धाञ्जली व्यक्त गर्दै शोक प्रस्ताव पनि पारित गरिएको छ। प्रतिनिधिसभाको अर्को बैठक मंगलबार दिउँसो १ बजे बस्नेछ।
