समाचार सुन्नुहोस :
काठमाडौँ – सर्वोच्च अदालतले सरकारले गरेका राजदूत फिर्ता गर्ने निर्णय तत्काल लागू नगर्न आदेश दिएको छ। न्यायाधीश शारंगा सुवेदी र श्रीकान्त पौडेलको संयुक्त इजलासले सरकारका नाममा अन्तरिम आदेश जारी गरेको हो।
सरकारले असोज ३० गते विभिन्न ११ देशका लागि नियुक्त राजदूतहरूलाई फिर्ता बोलाउने निर्णय गरेको थियो। सो निर्णय खारेज गर्न माग गर्दै पत्रकार सुनिल भट्टराईले प्रधानमन्त्री तथा मन्त्रिपरिषद् कार्यालय र परराष्ट्र मन्त्रालय विरुद्ध रिट दायर गरेका थिए।
सरकारले फिर्ता बोलाएका राजदूतहरूमा चीनका प्रा. डा. कृष्णप्रसाद ओली, जर्मनीका डा. शैल रुपाखेती, इजरायलका प्रा. धनप्रसाद पण्डित, मलेसियाका डा. नेत्रप्रसाद तिमल्सिना, कतारका रमेशचन्द्र पौडेल, रुसका जंगबहादुर चौहान, साउदी अरबका नरेशविक्रम ढकाल, स्पेनका सनिल नेपाल, बेलायतका चन्द्रकुमार घिमिरे, अमेरिकाका लोकदर्शन रेग्मी र जापानका डा. दुर्गाबहादुर सुवेदी रहेका छन्।
