टोकियो – विदेशी नागरिकसम्बन्धी नीतिहरूमा समन्वय गर्न जापान सरकारले मन्त्रिपरिषद्का सदस्यहरूसँग बैठकको तयारी गरिरहेको छ । मंगलबार नै छलफल हुन सक्नेछ । लिबरल डेमोक्रेटिक पार्टी र गठबन्धन साझेदार जापान इनोभेसन पार्टीले नियम कानुन उल्लंघन गर्ने विदेशी नागरिकको विषयमा सम्बोधन गर्न सहमति जनाएका छन् ।
विदेशी नागरिकसँग सुव्यवस्थित र सद्भावपूर्ण सहअस्तित्व समाजका लागि जिम्मेवार मन्त्रीको पद सिर्जना गरिएको छ, र आर्थिक सुरक्षा मन्त्री ओनोडा किमीले सो भूमिकामा जिम्मेवारी सम्हालिरहेकी छिन् । मुख्य क्याबिनेट सचिव किहारा मिनोरुको नेतृत्वमा हुने यस बैठकले विभिन्न मुद्दाहरूमा विचार गर्ने अपेक्षा गरिएको छ ।
यसमा विदेशी नागरिकद्वारा भूमि अधिग्रहणसम्बन्धी नियमहरूको समीक्षा, अध्यागमन सेवाहरू कडा पार्ने र अत्यधिक पर्यटनको सम्बोधन गर्ने जस्ता विषयहरू समावेश छन् । प्रधानमन्त्री ताकाइची सनाएले अक्टोबर २४ को नीतिगत भाषणमा भनिन् कि जापानीहरूले असहज वा अन्याय महसुस गरिरहेका छन् किनभने विदेशी नागरिकहरूको एउटा सानो समूह अवैध गतिविधिमा संलग्न छ वा नियमहरूबाट विचलित भइरहेको छ ।
उनले यो पनि भनिन्, ‘सरकारले विदेशीप्रतिको घृणाविरुद्ध स्पष्ट रेखा कोरेको छ, तर यस विषयमा प्रतिक्रिया दिन दृढ रहनेछ । सरकारले विज्ञहरूको राय सुनेपछि अर्को वर्ष जनवरीसम्ममा एउटा आधारभूत नीति तर्जुमा गर्ने योजना बनाएको छ ।
