समाचार सुन्नुहोस :
काठमाडौँ – सर्वोच्च अदालतका शाखा अधिकृत महिमानसिंह विष्टलाई धरौटीमा रिहा गर्न काठमाडौं जिल्ला अदालतले आदेश दिएको छ। उक्त आदेश न्यायाधीश दिनबन्धु बरालको इजलासबाट जारी गरिएको हो।
विष्टले नागरिक उन्मुक्ति पार्टीका संरक्षक रेशम चौधरीलाई नियन्त्रणमा लिन ‘अनधिकृत’ पत्र लेखेपछि उनी पक्राउ परेका थिए। सो पत्रकै आधारमा प्रहरीले चौधरीलाई नेपाल प्रज्ञा प्रतिष्ठानमा आयोजित एक कार्यक्रममा सहभागी हुने क्रममा नियन्त्रणमा लिएको थियो। सोही घटनाको समयमा सीके राउत नेतृत्वको जनमत पार्टीसँग चौधरीको पार्टीबीच एकता घोषणा हुन लागेको थियो।
विष्टले टीकापुर घटनासँग सम्बन्धित कर्तव्य ज्यान, हत्या प्रयास र डाँका चोरी मुद्दामा चौधरीलाई पक्राउ गरी थुनामा राख्न पत्र लेखेका थिए। प्रहरीले लिएको बयानमा विष्टले टीकापुर घटनामा ज्यान गुमाएका व्यक्तिहरूको “आत्माले पोलिरहेकाले” यस्तो पत्र लेख्न बाध्य भएको बताएका छन्।
