टोकियो – जापानमा चामलको मूल्य १८ सातापछि पहिलोपटक घटेको छ । सरकारद्वारा भण्डारण गरिएको चामल बजारमा ल्याइएपछि आपूर्तिमा सुधार देखिँदै मूल्यमा कमी आएको जापानी सरकारले जनाएको छ ।
कृषि, वन तथा मत्स्य मन्त्रालयका अनुसार मे ४ सम्मको सातामा देशभरका सुपरमार्केटहरूमा बिक्री भएको चामलको ५ किलोग्रामको औसत मूल्य १९ येन घटेर ४,२१४ येन (लगभग २८.५० अमेरिकी डलर) मा झरेको छ । यो मूल्य अघिल्लो हप्ताको तुलनामा घटेको हो, जुन मूल्य सन् २०२२ को मार्चदेखि डाटासङ्कलन सुरु भएयता सबैभन्दा उच्च थियो ।
तर मूल्य अझै पनि एक वर्षअगाडिको तुलनामा झन्डै दोब्बर नै रहेकाले मूल्य घट्ने क्रम निरन्तर रहन्छ कि रहँदैन भन्ने स्पष्ट भइसकेको छैन । सरकारले खुलाएको भण्डारणको अधिकांश भाग पाएको नेसनल फेडेरेसन अफ एग्रीकल्चरल को-अपरेटिभ एशोसिएसन्स (जाफा) ले ती चामल बजारमा ल्याउने काम अघि बढाइरहेको छ । स्थितिलाई सन्तुलनमा ल्याउन सरकारले ३१२,००० टन भण्डारित चामल बजारमा ल्याउने निर्णय गरेको हो ।
सरकारी हस्तक्षेपपछि मूल्यमा आएको यो गिरावटले चामल बजारमा स्थिरता आउने अपेक्षा गरिएको छ, यद्यपि दीर्घकालीन प्रभावका लागि अझै प्रतीक्षा गर्नुपर्ने देखिन्छ ।
