समाचार सुन्नुहोस :
काठमाडौँ – नेपाल सुपर लिग (एनएसएल) २०२५ अन्तर्गत लिग चरणको अन्तिम खेलमा आज धनगढी एफसी र एफसी चितवन आमनेसामने हुँदैछन्। तीन टोली पहिले नै प्लेअफमा स्थान सुरक्षित गरिसकेका छन् र आजको खेलले बाँकी रहेको चौथो स्थानको निर्णय गर्नेछ।
पाँच खेलमा ७ अंक जोडेको एफसी चितवनका लागि यो खेल निर्णायक छ। चितवन जितेमा तेस्रो स्थानमा रहँदै प्लेअफ पुग्नेछ भने बराबरी गरे पनि ८ अंक पुर्याउँदै गोल अन्तरका आधारमा काठमाडौं रेजर्सलाई पछि पारेर अन्तिम चारमा स्थान सुरक्षित गर्नेछ। उता, चितवनको प्रतिद्वन्द्वी धनगढी एफसी भने पाँच खेलमै ११ अंक जोड्दै दोस्रो स्थानमा पुगिसकेको छ र प्लेअफको यात्रा पहिले नै सुनिश्चित गरिसकेको छ।
यसैबीच, मैदान बाहिर काठमाडौं रेजर्सका समर्थकहरू चितवनको हारको अपेक्षामा छन्। ६ खेलबाट ८ अंकसहित चौथो स्थानमा रहेको काठमाडौंको गोल अन्तर माइनस १ रहेको छ, जबकि चितवनको हाल शून्य गोल अन्तर छ। बराबरी भएमा चितवन गोल अन्तरका आधारमा अगाडि रहनेछ।
पोखरा थण्डर्सले भने ६ खेलबाट ८ अंक र प्लस १ गोल अन्तरका साथ काठमाडौंलाई पछि पार्दै प्लेअफमा स्थान बनाइसकेको छ।त्यसैले, चितवन र धनगढीबीचको आजको भिडन्तले मात्र चितवनको हैन, काठमाडौं रेजर्सको भविष्य पनि निर्धारण गर्नेछ।
