समाचार सुन्नुहोस :
काठमाडौँ – शनिबार राति भोजपुरमा भएको एक ट्याक्टर दुर्घटनामा दुई जनाले ज्यान गुमाएका छन् भने दुई जना घाइते भएका छन्। मध्यपहाडी लोकमार्गअन्तर्गत भोजपुर नगरपालिका–३ सेतीबगरमा दुर्घटना भएको प्रहरीले जनाएको छ। दुर्घटनामा परी भोजपुर नगरपालिका–५ का वडा सदस्य, करिब ५२ वर्षीय नीरप्रसाद फुयाँल र सोही ठाउँका ५५ वर्षीय भक्तबहादुर थापाको घटनास्थलमै मृत्यु भएको प्रहरीले जनाएको छ।
प्रहरीका अनुसार ट्याक्टर गोबर मल बोकेर बोखिमबाट छिनामखुतर्फ जाँदै थियो। प्रदेश १–०२–००३ त ११२४ नम्बरको उक्त ट्याक्टर साँघुरो मोडमा पुग्दा नियन्त्रण गुमाई करिब ५० मिटर तल खसेको थियो।
भोजपुरका प्रहरी प्रमुख डीएसपी युवराज तिमिल्सिनाका अनुसार दुर्घटनामा परेका चालक धरान उपमहानगरपालिका–५ का ३२ वर्षीय विशाल बोहोरा र सहचालक संखुवासभाको सभापोखरी गाउँपालिका–३ का करिब ४० वर्षीय दिलबहादुर श्रेष्ठ घाइते भएका छन्। घाइतेहरूको अवस्था गम्भीर रहेको जनाइएको छ।
