तोकुशिमा : अपार्टमेन्टमा महिलाको छुरा प्रहारबाट मृत्यु

टोकियो – जापानको तोकुशिमा प्रान्तमा एक महिलाको शव आफ्नै अपार्टमेन्टमा छुरा प्रहार गरी हत्या गरिएको अवस्थामा फेला परेको छ । पोष्टमार्टम अनुसार ती महिलाको मृत्यु केही दिनअघि नै भइसकेको थियो ।

एक्लै बस्ने मामी कानो नामकी ५० वर्षीया महिलाको शव प्रहरीले फेला पारेको हो । उनका बुवाले छोरीसँग लामो समयसम्म सम्पर्क हुन नसकेको भन्दै प्रहरीलाई खबर गरेका थिए । त्यसपछि प्रहरी अपार्टमेन्टमा पुगेको र उनको शव पिठ्युँमा छुरा प्रहार गरिएको अवस्थामा भेटिएको हो ।

प्रहरीका अनुसार अपार्टमेन्टमा जबर्जस्ती पसेको वा चोरिएको कुनै संकेत थिएन । प्रहरीले घटनास्थल वरपरका सुरक्षा क्यामेराको फुटेज जाँच गरिरहेको बताएको छ ।