समाचार सुन्नुहोस :
काठमाडौँ – माध्यमिक शिक्षा परीक्षा (एसईई) आगामी दिनमा नहुने गरी सहमति जुटेको छ। संसदको शिक्षा, स्वास्थ्य तथा प्रविधि समितिको उपसमितिमा विद्यालय शिक्षा विधेयकमाथिको दफावार छलफलका क्रममा एसईई खारेज गर्ने सहमति गरिएको हो। नयाँ संरचनाअनुसार कक्षा १ देखि ८ सम्मको परीक्षा स्थानीय तहले लिनेछ भने माध्यमिक तहको परीक्षा राष्ट्रिय परीक्षा बोर्डले सञ्चालन गर्नेछ। विद्यालय तहको अन्तिम परीक्षा अब कक्षा १२ मा हुने भएकाले कक्षा १० को परीक्षा स्कुलस्तरमै हुनेछ।
एसईईलाई प्रदेशमा हस्तान्तरण गर्ने संशोधन पनि प्रस्ताव भएपनि अन्ततः परीक्षा नै नराख्ने निर्णय उपसमितिले लिएको छ। त्यससँगै जिल्ला शिक्षा कार्यालय र शिक्षा विभाग पनि नराख्ने सहमति बनेको छ। शिक्षा समितिको उपसमितिमा विधेयकमाथि निरन्तर छलफल भइरहेको छ। प्रदेशहरूबाट आएका सुझाव, सांसद र विज्ञहरूको सुझावलाई समेट्दै अन्तिम प्रतिवेदन तयार पारिने तयारी छ। साथै, प्रारम्भिक बाल शिक्षा (ईसीडी) दुई वर्षको बनाउने प्रस्तावमा पनि सहमति जुटेको छ।
शिक्षकका विषयमा छलफल बाँकी रहे पनि सरकारले शिक्षकमाथि भएका पुराना सहमति र अहिलेको आन्दोलनबीच समन्वय गरेर समाधान खोज्ने प्रयास गरिरहेको उपसमितिले जनाएको छ। २० चैतदेखि शिक्षकहरूको आन्दोलन जारी छ।
