टोकियो – जापानका करिब २४ प्रतिशत ट्राफिक बत्तीहरू प्रतिस्थापन मिति नाघेको पाइएको छ । जापानको राष्ट्रिय प्रहरी एजेन्सीका अनुसार, आर्थिक वर्ष २०२३ मा देशभरका २४ प्रतिशत ट्राफिक बत्तीहरू प्रतिस्थापनको म्याद नाघिसकेको अवस्थामा छन् । यसले बत्तीहरू बिग्रिएर काम नगर्नु वा सडकमा खस्ने जस्ता घटनाबाट गम्भीर दुर्घटनाको जोखिम बढाएको छ ।
सामान्यतः ट्राफिक बत्तीको नियन्त्रण प्रणाली (कन्ट्रोलर) को आयु १९ वर्षको हुन्छ । प्रहरीको तथ्याङ्क अनुसार, आर्थिक वर्ष २०२३ मा ४९,६८४ वटा ट्राफिक बत्तीहरू (जुन कुलको २४.३ प्रतिशत हो) म्याद नाघिसकेको अवस्थामा थिए । यो लगातार चौथो वर्ष हो, जसमा पुराना भएर पनि अद्यावधिक नगरिएका ट्राफिक बत्तीहरूको अनुपात २४ प्रतिशतको हाराहारीमै रहँदै आएको छ ।
एजेन्सीका अनुसार, ट्राफिक बत्ती स्थापना गरिएको १७ देखि २० वर्षपछि त्यसको बिग्रिने सम्भावना उच्च हुन्छ । आर्थिक वर्ष २०२३ मा ट्राफिक बत्तीसम्बन्धी ८३८ वटा समस्याहरू दर्ता भएका थिए, जसमध्ये ४७३ वटा १९ वर्षभन्दा पुराना कन्ट्रोलरहरूसँग सम्बन्धित थिए । आर्थिक वर्ष १९८० मा जापानमा करिब १ लाख ट्राफिक बत्तीहरू थिए, जुन संख्या आर्थिक वर्ष २००९ देखि २ लाखको हाराहारीमा पुगेको छ ।
एउटा ट्राफिक बत्ती प्रणालीलाई प्रतिस्थापन गर्न कम्तीमा १४ लाख येन खर्च लाग्छ । ‘संख्या बढेसँगै मर्मतसम्भार कठिन बन्दै गएको छ। धेरैजसो उपकरणहरू पुराना भइसकेका छन् र हरेक वर्ष ट्राफिक बत्तीका पोल तथा सडक संकेतहरू भत्कने थुप्रै घटनाहरू देखिन्छन्,’ एजेन्सीका एक वरिष्ठ अधिकारीले भने ।
