टोकियो – टीबीआई मिस टीन नेपाल जापान ट्यालेन्ट -२०१४ मा सेकेण्ड रनर अपको ताज पहिरिएकी समिक्षा थापा अभिनय क्षेत्रमा प्रवेश गरेकी छिन् ।
पोखरेली मोडेल रोशन कार्कीको म्युजिक भिडियोबाट थापा अभिनय यात्राको थालनी गरेकी हुन् ।
जीवन कला प्रेमीको स्वर रहेको ‘पीरतिको पासो’ गीतमा चलचित्र निर्देशक यादब भट्टराईको कथामा मोडेल कार्कीले नै निर्देशन गरेका छन् । नागोया आसपासको क्षेत्रमा सुटिङ गरिएको उक्त भिडियोमा राज महर्जनले छायाङ्कन गरेका हुन् ।
तोकाई होकुरिकुको एनआरएन संयोजक बिष्णु घिमिरे पनि यस भिडियोमा मोडेल कार्कीको कम्पनी मालिकको भूमिका निर्बाह गरेका छन् । म्युजिक भिडियोको छायाङ्कन हेर्न एनआरएन जापानका अध्यक्ष पारसमणि पोखरेललगायत केहि संगीतप्रेमी नेपालीहरु सुटिङ स्पटमा पुगेका थिए ।
लभ स्टोरी गीत भए पनि ब्यस्त जीवन शैलीमा कलेज जानुपर्ने, ड्युटी जानुपर्ने अनि प्रेमिकालाई दिने समय जस्ता कुरा भिडियोमा समेट्नुपर्ने भएकोले जापानको लोकेशन रोजेको निर्देशक कार्की बताउँछन् । यस म्युजिक भिडियोको सम्पादन भने नेपालमा र विमोचन जापानमा गरिने भएको छ । *** 
