काठमाडौं- माओवादी अध्यक्ष पुष्पकमल दाहाल ‘प्रचण्ड’ले कम्तीमा एउटा ब्रिगेडियर जनरल दिलाउने भन्दै लडाकु कमान्डरहरूलाई आश्वस्त पारेका छन् ।माओवादी शीर्ष नेतृत्व र लडाकु कमान्डरबीच मंगलबार र बुधबार चलेको छलफलमा दाहालले अन्य राजनीतिक दलसँगको छलफल सकारात्मक रहेको र पछिल्लो समय सेना पनि अन्य विषयमा लचक देखिएकाले सम्मानजनक समायोजन हुनेमा विश्वस्त रहन कमान्डरहरूलाई आग्रह गरे ।
लडाकु डेपुटी कमान्डर चन्द्रप्रकाश खनालले मेजर जनरल (उपरथी) आफूहरूको बटमलाइन भएकाले त्यसको दाबी नछोड्न नेतृत्वलाई आग्रह गरेको बताए । एक उपरथी, २ ब्रिगेडियर जनरल, ८ महासेनानी र १६ प्रमुख सेनानी पदमा माओवादीको दाबी छ । समायोजन हुने संख्याको अनुपातमा मेजरसम्मका पद दिन सेना सकारात्मक रहेको नेतृत्वबाट बि्रफिङ भएपछि कमान्डरहरूले त्यसमाथिका पदको दाबी दोहोर्याएका हुन् ।
