काठमाडौं – प्रधानमन्त्री बाबुराम भट्टराईले आफू शान्ति प्रक्रिया र संविधान निर्माण सकेर मात्र कुर्सी छाड्ने बताएका छन्। आफ्नो राजीनामाले समस्या झन् बल्झने उनले ठोकुवा गरे।
‘शान्ति र संविधान पूरा नभई कुर्ची छाड्दिनँ,’ बुधबार स्याङ्जा चापाकोटमा कालीगण्डकी गोल्डकप फुटबल प्रतियोगिता उदघाटन गर्दै प्रधानमन्त्रीले भट्टराईले भने, ‘मैले छाड्दा समस्या सुल्झन्न, झनै बल्झिन्छ।’
उनले शान्ति र संविधानको ‘डेटलाइन’ सकिन लागेकाले पनि सरकार फेर्न नहुने बताए। ‘समय पटक्कै छैन,’ उनले भने, ‘सरकार फेर्ने होइन, दलहरुबीच विश्वास कायम गर्दै छिटो काम सक्नुपर्छ।’
दलहरुबीच विश्वास कायम गर्दै जेठ १४ भित्रै शान्ति प्रक्रिया र संविधान दिने उनले दोहोर्याए। ‘सत्यनिरुपण र मेलमिलाप आयोग छिट्टै गठन हुन्छ,’ उनले भने, ‘बेपत्ता आयोग गठन र सहिद परिवारलाई राहत दिने सरकारको प्राथमिकता हो।’ केही सातामै योग्य लडाकुलाई सेनामा समायोजन गर्ने काम थालिने उनले बताए। उनले समयमै संविधान बन्नेमा शंका नगर्न पटकपटक आग्रह गरेका थिए। ‘संविधानसभाले संविधान समयमा बनाउनै पर्छ, यो वा त्यो बहानामा शान्ति प्रक्रिया भाँड्ने वा संविधान बन्न नदिने षड्यन्त्रलाई हामीले परास्त गर्नैपर्छ,’ उनले भने, ‘सरकारप्रमुखको हैसियतले म निकै सचेत छु, यसमा सबैको साथ आवश्यक छ।’ ***
