१८ वर्ष पुगेकाले मतदान गर्न पाउने

काठमाडौ– नयाँ संविधानमा देखिएको विवाद समाधान गर्न गठित उपसमितिको मंगलबार बसेको बैठकले मतदाताको उमेरका विषयमा कायम विवादलाई अन्त्य गरेको छ । १८ वर्ष पुगेको नेपाली नागरिकले आम निर्वाचनमा भाग लिन पाउने संवैधानिक व्यवस्थाका लागि दलहरु सहमत भएका छन् । दलहरुबीच मतदाताको उमेर १६ वा १८ राख्ने विषयमा मतभेद रहेको थियो ।

त्यस्तै,मिश्रित निर्वाचन प्रणाली अपनाउने बारे पनि दलहरुबीच सहमति बनेको छ । नयाँ संविधानमा प्रत्यक्ष तथा समानुपातिक निर्वाचन प्रणाली अपानाउने व्यवस्था गरिने भएको छ । प्रत्यक्ष र समानुपातिकका लागि प्रतिशतका विषयमा भने दलहरु सहमतिमा पुगिसकेका छैनन् । ६०/४० वा ५०/५० प्रतिशत राख्ने विषयमा छलफल भइरहेको कांग्रेस नेता रामचन्द्र पौडेलले बताए । संविधानसभा निर्वाचनमा मिश्रित निर्वाचन प्रणाली अपनाइएको थियो ।