काठमाडौ– चिनियाँ प्रधानमन्त्री वेन जियावाओको पुस पहिलो साता हुने भनिएको नेपाल भ्रमण स्थगित भएको छ । उच्चस्रोतका अनुसार चिनियाँ पक्षले आफ्नै काराणले भ्रमण स्थगित गरेको हो ।पुस ५ देखि ७ सम्म १० जना मन्त्री सहित सय जना भन्दा बढी संख्याको औपचारिक प्रतिनिधिमण्डलसहित चिनियाँ प्रधानमन्त्री नेपाल भ्रमणमा आउने कार्यक्रम तय भएको थियो । यद्यपी चीनले आफ्नो प्रधानमन्त्रीको नेपाल भ्रमण बारे औपचारिक रुपमा तिथी सार्वजनिक गरेको थिएन । यद्यपी उनको भ्रमण स्थागित हुनका कारण भने खुलाईएको छैन ।
प्रधानमन्त्री बाबुराम भट्टराई तथा परराष्ट्रमन्त्री नारायणकाजी श्रेष्ठले चिनियाँ प्रधानमन्त्रीको नेपाल भ्रमणको तिथी सार्वजनिक गरेका थिए । चिनियाँ प्रधानमन्त्रीको नेपाल भ्रमणको तयारी बारे छलफल गर्न परराष्ट्रमन्त्री श्रेष्ठ बेइजिङ पनि पुगेका थिए ।
नेपालमा चिनियाँ प्रधानमन्त्री जियावाओको भ्रमणको तयारी समेत सुरु भइसकेको थियो । नेपाल सरकार र चीन बीचमा एजेण्डाहरुको अदानप्रदानसमेत भइसकेको थियो । चिनले आफ्नो प्रधानमन्त्रीको भ्रमणमा तिब्बती मामिलालगायत सुरक्षा चासोलाई आफ्नो एजेण्डा बनाउने भएको थियो भने नेपाल सरकारले उत्तर–दक्षिणका चार राजमार्गसहित केही आर्थिक प्याकेजमा सहयोग माग्ने कार्यसूची तयार पारेको थियो ।
