विराटनगर- पूर्व उपप्रधान तथा अर्थमन्त्री भरतमोहन अधिकारीले डा.बाबुराम भट्टराई नेतृत्वको वर्तमान सरकार इतिहासकै भ्रष्ट भएको आरोप लगाउनु भएको छ ।विराटनगरमा आज पत्रकारसंग कुरा गर्दै एमाले नेता समेत रहनु भएका अधिकारीले बाबुराम राम्रो भएपनि अरु मन्त्रीहरुका कारण यो सरकार भ्रष्ट भएको आरोप लगाउनु भएको हो । नेता अधिकारीले संविधानसभा निर्वाचन पछि एमाले र एकीकृत नेकपा माओवादीले दुई दुई पटक सरकारको नेतृत्व गरिसकेकोले अबको सरकारको नेतृत्व कांग्रेसलाई गर्न दिनुपर्ने बताउनु भयो । उहांले थपिएको समयभित्रै नयाँ संविधान ल्याउनु पर्ने बाध्यता रहेकोले सबै दलहरु सहमतिमा आउनुपर्नेमा अधिकारीले जोड दिनुभयो ।
एक फरक प्रसंगमा नेता अधिकारीले विकास निर्माणको कामबारे जनतालाई जानकारी दिन जिल्लामा आएका विकास निर्माणका कामहरु सार्वजनिक गर्न जिल्ला विकास समितिलाई आग्रह समेत गर्नुभयो ।
