टोकियो – नेपाल ट्रेड युनियन कांग्रेसकी केन्द्रीय उपाध्यक्ष तथा महिला शिप विकास केन्द्रकी अध्यक्ष रिता खनाल हालै जापानमा एक अष्ट्रियन संस्थाद्वारा सम्मानित हुनुभएको छ । अन्तरराष्ट्रिय रुपमा सामाजिक क्षेत्रमा उल्लेखनीय योगदान पुर्याए वापत नोबेल पुरस्कार विजेता अष्ट्रियन नागरिक अलवर्टको नाममा स्थापित संस्थाले संसारभरका सामाजिक क्षेत्रमा विशेष काम गर्दै आइरहेकाहरुलाई हरेक वर्ष मेडल र प्रमाण पत्रले कामको कदर र प्रोत्साहन गर्दै आइरहेको छ । यस वर्ष नेपालमा गृहिणी शिक्षा र महिला शिप विकासका क्षेत्रमा उल्लेखनीय योगदान पुर्याएकाले रिता खनाललाई उक्त सम्मान गरिएको हो । त्यस अवसरमा उहाँसँगै जापानका तीनजना व्यक्तित्व पनि सम्मानित हुनुभएको थियो ।
जापानको चिवा केनमा जापानका व्युटिसियनहरुको सामाजिक संस्था एसपिसिको वार्षिक साधारण सभाका अवसरमा आयोजित एक भव्य समारोहमा उक्त सम्मानद्वारा श्रीमती खनाल सम्मानित हुनुभएको हो । एसपिसि जापानले पनि पृथ्वीसंरक्षण अभियान, साक्षरता अभियान र स्वास्थ्य खासगरी स्वच्छ पानीका लागि अभियान संचालन गर्दै आइरहेको छ र नेपालमा पनि सामूदायिक अध्ययन तथा तालिम केन्द्र तथा खानेपानी कार्यक्रमहरुमा सहयोग पुर्याउँदै आएकाले एसपिसि जापानकै सिफारिसमा नेपाली महिलाको छनौट भएको बुझिएको छ । एसपिसि जापानले संसारका मानिसहरुका भाषा र संस्कृति फरक भए पनि अशिक्षा र अभावलाई हटाउन सकियो भने संसारका मानिस सबैको उन्नति हुन सक्छ कि भन्ने सकारात्मक सोचाइका साथ कार्यक्रम अघि बढाइरहेको छ । ४५ वर्षको इतिहास भएको उक्त संस्था असहाय र आर्थिक रुपमा कमजोर समुदायमा काम गर्दै र काम गर्नेहरुलाई सघाउँदै आएको कुरा उक्त संस्थाका संस्थापक योकोयामाले बताउनु भयो ।
उक्त सम्मान ग्रहण गरेपछि आफ्नो छोटो मन्तव्य दिँदै श्रीमती खनालले आफूले अहिले नै यस किसिमको सम्मानको अपेक्षा नगरेको र यस सम्मानले सामाजिक क्षेत्रमा अझ बढी काम गर्न हौसला मात्रै नभएर दायित्व नै थपिएको आभाष भैरहेको बताउनु भयो । त्यसैगरी उहाँले नेपालमा शिक्षा, स्वास्थ्य र पिछडिएका वर्गका लागि गर्नुपर्ने काम धेरै भएकाले एसपिसि लगायतका संघ संस्थाको थप सहयोगका लागि पनि आव्हान गर्नुभयो ।
