काठमाडौं- माओवादी अध्यक्ष पुष्पकमल दाहाल ‘प्रचण्ड’लाई एक पत्र लेख्दै केन्द्रीय सदस्य भरत बम ‘रणवीर’ले पार्टीले जनयुद्धको मर्मविपरीत काम गर्न लागेको भन्दै ध्यानाकर्षण गराएका छन् ।
श्रद्धय अध्यक्ष क. प्रचण्ड
एकीकृत नेकपा (माओवादी)
पेरिसडाँडा, काठमाडौं । मितिः ०७८/०९/०९
अभिवादन,
राष्टियता, जनतन्त्र र जनजिविकाको मुद्धालाई वास्तविक अर्थमा नेपाली धर्तीमा लागु गर्न र वर्गीय मुक्ति संघर्षलाई विश्वब्यापी बनाउँदै वर्गविहिन समाज निर्माणको महान उद्देश्यसहित हाम्रो गौरवशाली पार्टी एकीकृत नेकपा माओवादीले ऐतिहासिक जनयुद्धको संखघोष गर्यो । त्यही ऐतिहासिक पहलकदमी थाल्नुअघि पार्टीकै बैधानिक मोर्चा तत्कालीन संयुक्त जनमोर्चा नेपालको नाममा तत्कालीन सरकारसमक्ष ४० सुत्रीय माग पेश गर्यो । सोही मोर्चाको नामबाट क. बाबुराम भट्टराईले पेश गर्नुभएको मागमा राष्टियतासँग सम्बन्धित ९ वटा बुँद्धा क. भट्टराई नै प्रधानमन्त्री भएको बेला उपेक्षित बनेका छन् । उल्टै राष्टघाती बिप्पा सम्झौता गरेपछि राष्टिय स्वाधिनताको सवाल झन् गम्भीर बनेको छ ।
त्यसैले देशलाई ठगिनबाट जोगाउन नेपालीलाई भारतका कमैया बन्नबाट मुक्त गर्न यो देशको स्वाधिनता रक्षा गर्न र राष्ट्रिय पुँजीलाई टेवा दिएर अर्थतन्त्रलाई आत्मनिर्भर बनाउन सम्पूर्ण राष्ट्रवादी देशभक्त र गणतन्त्रवादीहरु एकजुट भएर माथिल्लो कर्णाली परियोजना खारेज गर्न भेरी कर्णाली का जनताबाट जोडदार माग, अपेक्षा र विश्वास गरिएको छ । हाल संम्झौतामा रहेको भारतिय कम्पनीलाई अन्तराष्ट्रिय मान्यता अनुसार आवश्यक परेमा सरकारले क्षतिपूर्ति दिएर संम्झौता रद्द गरी विकल्पको रुपमा नेपाल सरकार आफैले ३०० मेगावाटको परियोजना निर्माण गर्ने वा राष्ट्रिय पूँजीपतिहरुको समुह बनाई सो परियोजना निर्माण गर्नु राष्ट्रिय स्वाधिनता र आत्मनिर्भर अर्थतन्त्र निर्माणको पक्षमा कोसेढुङ्गा सावित हुने छ ।पार्टीले जलश्रोतबारे भएका सम्झौताको विषयमा हाल लिएको पुर्न वार्ताको नीति र निर्णय अपर कर्णाली सम्झौता (जो राष्ट्रघाती छ, जीएमआरले निर्माणका लागि लाइसेन्स लिने प्रक्रिया अगाडि बढाइसकेको छ)को सन्दर्भमा अपर्याप्त छ । यति मात्रै हैन, यसले पार्टी र पार्टी नेतृत्वप्रति गम्भीर आशंका उठ्ने स्थिति पैदा भएको छ । त्यसैले उक्त परियोजनाको सम्झौता खारेज गर्नुुपर्ने आवश्यकता छ । र, यो निर्णय जारी केन्द्रीय समिति बैठकले गर्नको लागि जोडदार माग गर्दछु ।
धन्यवाद ।
भरत बम ‘रणवीर’
केन्द्रीय सदस्य
तथा
सह सेक्रेटरी
भेरी कर्णाली राज्य समिति
एकीकृत नेकपा (माओवादी)
