टोकियो – ओसाका वर्ल्ड एक्स्पोजिसनका आयोजकले भूमिगत मिथेन ग्यास प्रज्वलनको सम्भावित जोखिमका बाबजुद, आफ्नो पूर्व नीतिलाई उल्ट्याउँदै जुन महिनाको शुरुवातसम्ममा कार्यक्रम स्थलभित्र दुईवटा धुम्रपान क्षेत्र स्थापना गर्ने निर्णय गरेको छ ।
हालसम्म, धुम्रपान गर्न चाहनेहरूले १५५ हेक्टरको विशाल परिसर छाडेर पूर्वी द्वारबाहिर रहेका दुई तोकिएका स्थानमा जानुपर्ने बाध्यता थियो । सहज धुम्रपान स्थलको अभावले केही कर्मचारी तथा सहभागीहरू अनाधिकृत स्थानमा धुम्रपान गर्न बाध्य भएका थिए । आयोजक समितिका अनुसार, धुम्रपान गर्ने कर्मचारीहरूले विशाल परिसर पार गरेर धुम्रपान क्षेत्रसम्म पुग्नुपर्ने असुविधाबारे गुनासो गरेपछि यो निर्णय लिइएको हो ।
नयाँ धुम्रपान क्षेत्रमध्ये एक पश्चिमी भागमा स्थापना गरिनेछ । सन् २०२४ मार्चमा, वेल्डिङको झिल्काले मिथेन ग्यासमा आगो सल्किँदा विस्फोट भएको थियो । यस घटनाले कार्यक्रम स्थलको भूमिगत तहमा जम्मा भएको मिथेन ग्यासले विश्वका नेताहरू सहभागी हुने यस विश्वव्यापी कार्यक्रममा गम्भीर दुर्घटना निम्त्याउन सक्ने चिन्ता बढाएको थियो ।
जापान एसोसिएसन फर द २०२५ वर्ल्ड एक्स्पोजिसनका उप-महासचिव जुन ताकाशिनाले सोमबार आयोजित पत्रकार सम्मेलनमा भने, ‘धुम्रपान क्षेत्रहरू त्यस्तो स्थानमा स्थापना गरिनेछ जहाँ अग्नि नियन्त्रण विभागले खुला आगो बाल्न निषेध गरेको छैन ।’
यसैबीच, स्वास्थ्य विज्ञहरूले अप्रत्यक्ष धुम्रपान (सेकेन्डह्यान्ड स्मोक) को मुद्दा औंल्याउँदै, तोकिएको क्षेत्रमा भए पनि धुम्रपानलाई अनुमति दिनु ओसाका एक्स्पोको ‘दिगो समाज निर्माण र जीवनस्तर सुधार’ भन्ने मूल नाराविपरीत भएको बताएका छन् । उनीहरूले पूर्वी द्वारबाहिर रहेका दुईमध्ये एक विद्यमान धुम्रपान क्षेत्रले पहिल्यैदेखि अरूलाई अप्रत्यक्ष धुम्रपानको असरमा पारिरहेको पनि थपेका छन् ।
