समाचार सुन्नुहोस :
काठमाडौँ – अरनिको राजमार्गअन्तर्गत सूर्यविनायकदेखि साँगा जोड्ने सडकखण्डमा आइतबार सुक्खा पहिरो खस्दा एक जना मजदुर घाइते भएका छन्। भक्तपुरको साँगास्थित सूर्यविनायक नगरपालिका–१० मा पर्ने झोलुङ्गे पुलमुनि सडक विस्तारको काम भइरहेका बेला अचानक खसेको पहिरोले काममा खटिएका मजदुरलाई च्यापेको हो।
घाइते हुनेमा बर्दियाको वारबर्दिया नगरपालिका–५ निवासी ५२ वर्षीय तुलारा थारू रहेका छन्। उनि हाल सूर्यविनायक–९ पलासेँमा बसोबास गर्दै आएका छन्। उनलाई तुरुन्त उद्धार गरी सूर्यविनायक नगर अस्पतालमा उपचारका लागि पठाइएको जिल्ला प्रहरी परिसर भक्तपुरले जनाएको छ।
उक्त क्षेत्रमा सडक विस्तारका काम अत्यन्त जोखिमपूर्ण अवस्थाबाट भइरहेको छ। विशेषगरी साँगाबाट धुलिखेलतर्फको खण्ड र जगाति–साँगा खण्डमा काम गर्ने मजदुर तथा यात्रा गर्ने सर्वसाधारण दैनिक जोखिम मोल्न बाध्य छन्। ढिलो भइरहेको निर्माण कार्य, पहिरोको सम्भावना र भीरालो भूगोलका कारण दुर्घटनाको जोखिम उच्च छ।
