समाचार सुन्नुहोस :
काठमाडौँ – पवित्र तीर्थस्थल गोसाइँकुण्डमा स्नान गर्न भक्तजनको आगमन सुरु भएको छ। यहि जेठ १३ गतेदेखि सुरू हुने विशेष गङ्गा दशहरा मेला जेठ २४ गते एकादशीसम्म चल्ने गोसाइँकुण्ड क्षेत्र विकास समितिले जनाएको छ। यस वर्षको मेलामा करिब पाँच हजार भक्तजनले स्नान गर्ने अपेक्षा गरिएको छ।
समुन्द्र सतहबाट ४,३८० मिटर उचाइमा रहेको गोसाइँकुण्ड पुग्न काठमाडौँदेखि धुञ्चेसम्म सवारी र त्यसपछि तिवारी बगर, खन्ति, देउराली, डिम्सा, चोलाङपाटी हुँदै पैदल यात्रा गर्नुपर्ने हुन्छ। आज बिहान मात्रै पतञ्जली योग समितिमार्फत २५० भन्दा बढी भक्तजन गोसाइँकुण्डतर्फ प्रस्थान गरिसकेको नेपाल प्रहरीले जनाएको छ।
धार्मिक मान्यताअनुसार जीवनमा एकपटक पुग्नुपर्ने पवित्र स्थल मानिने गोसाइँकुण्डमा वर्षभरि भक्तजनको आवतजावत भइरहन्छ। विशेष गरी गङ्गा दशहरा र जनैपूर्णिमाका अवसरमा यहाँ १५ दिनसम्म विशेष मेला लाग्ने गर्छ। यात्रुहरूका लागि बासस्थान र होटलको सुविधा पनि उपलब्ध छन्। कृषि वैज्ञानिक डा. ताराबहादुर घिमिरेका अनुसार अनुपम प्राकृतिक दृश्यले यात्रा अझ रोमाञ्चक बनाएको छ।
