टोकियो – केन्द्रीय जापानको आइची प्रान्तको तहारा सहरमा आफ्ना हजुरबुबा र हजुरआमाको निर्मम हत्या गरेको अभियोगमा १६ वर्षीय एक किशोरलाई प्रहरीले शनिबार पक्राउ गरेको छ ।
प्रहरीका अनुसार, ती उच्च विद्यालय तहका विद्यार्थीमाथि शुक्रबार बिहान करिब २ बजेतिर ७५ वर्षीय हजुरबुबालाई छुरा प्रहार गरी हत्या गरेको आशंका छ । साथै, सोही घरमा ७२ वर्षीया हजुरआमाको शव समेत फेला परेको प्रहरीले जनाएको छ । पीडित दम्पती, अभियुक्त किशोर र अन्य दुई सदस्य सहित पाँच जनाको संयुक्त बसोबास रहेको थियो ।
प्रहरी अनुसन्धानमा ती किशोरले हजुरबुबाको हत्या आफैंले गरेको स्वीकार गरेका छन्। साथै, हजुरआमाको हत्या पनि आफूले नै गरेको संकेत दिएका छन् । दुवैको शवमा छुरा प्रहारका गहिरा र पटक-पटकका चोटहरू देखिएको प्रहरीले जनाएको छ ।
घटनापछि करिब बिहान ४:४० बजेतिर किशोरले आफ्ना हजुरबुबा-हजुरआमा शयनकक्षमा मृत अवस्थामा भेटिएको भन्दै परिवारका एक सदस्यमार्फत प्रहरीलाई खबर गरिएको थियो ।
पीडित र अभियुक्तको नाम उमेरको गोपनीयतालाई ध्यानमा राख्दै सार्वजनिक गरिएको छैन । घटनाको अनुसन्धान जारी रहेको प्रहरी स्रोतले जनाएको छ ।
