समाचार सुन्नुहोस :
काठमाडौँ – माध्यमिक विद्यालय तहको कक्षा १२ को वार्षिक परीक्षा आजदेखि देशभर एकैसाथ सुरु भएको छ। बिहान ८ बजेदेखि ११ बजेसम्म सञ्चालन भएको पहिलो दिनको परीक्षा शान्तिपूर्ण ढंगमा सम्पन्न भएको राष्ट्रिय परीक्षा बोर्डका अध्यक्ष महाश्रम शर्माले जनाएका छन्।
परीक्षा जेठ २ गतेसम्म सञ्चालन हुनेछ। बोर्डले देशभर १,५९० र जापानमा १ परीक्षा केन्द्र निर्धारण गरेको छ। काठमाडौँमा सबैभन्दा धेरै १६२ र मनाङ–मुस्ताङमा एक–एक परीक्षा केन्द्र छन्। नियमिततर्फ ३ लाख ९५ हजार ९०८ विद्यार्थी सहभागी भएका छन् भने आंशिकसहित कुल परीक्षार्थी संख्या ५ लाख ११ हजार ५२५ पुगेको छ।
सबैभन्दा कम ४५ जना परीक्षार्थी मनाङबाट र सबैभन्दा धेरै ६८ हजार १३३ जना काठमाडौँबाट सहभागी छन्। कारागार र बाल सुधारगृहमा रहेका परीक्षार्थीलाई समेत परीक्षा दिन व्यवस्था मिलाइएको छ।
यस वर्ष ७३ वर्षीया सूर्यवती खनालले पनि कक्षा १२ को परीक्षा दिएकी छन्। उनी तारकेश्वरस्थित ग्रामीण आदर्श बहुमुखी क्याम्पसकी विद्यार्थी हुन्। यसैबीच, काठमाडौँको प्रहरी हिरासतमा रहेका ६ जना अभियुक्तले पनि बोर्ड समन्वयमा परीक्षा दिएका छन्।
