समाचार सुन्नुहोस :
काठमाडौँ – राप्रपा नेपालका अध्यक्ष कमल थापाले वर्तमान संघीय, धर्मनिरपेक्ष गणतान्त्रिक व्यवस्था देशका लागि बोझ भएको बताएका छन्। उनले यो प्रणाली भ्रष्टहरू उत्पादन गर्ने कारखानामा परिणत भएको भन्दै यसबाट शान्ति, स्थायित्व र आर्थिक समृद्धिको अपेक्षा गर्नु भ्रम भएको टिप्पणी गरे।
१६३औं श्रमिक दिवसको अवसरमा राप्रपा नेपालआबद्ध मजदुर संगठन (टुकोन)ले बिहीबार गरेको कार्यक्रमलाई सम्बोधन गर्दै थापाले उदास, हतास र निरासालाई चिर्न व्यवस्था परिवर्तन जरुरी भएको बताएका हुन् । यस्तो अवस्थाबाट मुक्ति पाउनका लागि प्रणालीमै आमूल परिवर्तन आवश्यक रहेको उनको भनाइ थियो। उनले राजावादी र हिन्दूवादी शक्तिहरूलाई एकजुट हुन आह्वान गर्दै गणतन्त्रविरुद्ध आन्दोलनको पूर्वतयारी तुरुन्त सुरु गर्नुपर्ने धारणा व्यक्त गरे। “बर्खायाम सुरु हुनु अघिसम्म आन्दोलनको वातावरण तयार पार्नुपर्छ,” उनले भने।
थापाले समान विचारधारा बोकेकाहरूले साझा मोर्चा बनाएर अघि बढ्न ढिलाइ गर्नु नहुने सुझाव दिए। उनले राप्रपा नेपाल सधैं श्रमिकका हकहितका पक्षमा रहने दाबीसमेत गरे। कार्यक्रममा पार्टीका अन्य नेताहरू तारानाथ लुइँटेल, तेज कुरुङवाङ, यबती कार्की, हिक्मतजङ भण्डारी र अजेलिया रञ्जितकारले पनि आ-आफ्ना धारणा राखेका थिए।
