काठमाडौं – नागरिक उन्मुक्ति पार्टी (नाउपा)का संरक्षक रेशम चौधरी अन्ततः थुनामुक्त भएका छन् । सीके राउत नेतृत्वको जनमत पार्टीसँगको एकता घोषणा हुनै लाग्दा बुधबार दिउँसो प्रज्ञा प्रतिष्ठानबाट सादा पोसाकका प्रहरीद्वारा पक्राउ परेका चौधरी केही घण्टामै रिहा भएका हुन् ।
उनलाई सर्वोच्च अदालतको ‘आदेश कार्यान्वयन’ को नाममा कारागार चलान गरिएको थि यो। तर, पछि चौधरीको गिरफ्तारीमा प्रयोग भएको पत्र ‘अनधिकृत’ रहेको पुष्टि भएपछि सर्वोच्च अदालत आफैंले हस्तक्षेप गर्दै तत्काल रिहा गर्न निर्देशन दियो ।
सर्वोच्चको मुद्दा तथा रिट महाशाखाका शाखा अधिकृत महिमानसिंह विष्टको हस्ताक्षर रहेको पत्रका आधारमा चौधरीलाई डिल्लीबजार कारागारमा लगिएको थियो । तर, सो पत्र कुनै न्यायाधीशको निर्णयविना जारी गरिएको पाइएपछि विष्टलाई प्रहरीले नियन्त्रणमा लिएको छ । विष्टविरुद्ध अब कानुनी कारबाही अघि बढ्ने सर्वोच्च अदालतले जानकारी दिएको छ ।
