काठमाडौं – नेकपा (एकीकृत समाजवादी) का सांसद तथा पूर्वमन्त्री प्रेमबहादुर आलेले आफूले प्रतिनिधिसभामा अभद्र भाषा प्रयोग नगरेको दाबी गरेका छन् । सोमबारको प्रतिनिधिसभा बैठकमा उनले प्रयोग गरेको भनिएको शब्दविरुद्ध केही सञ्चारमाध्यमले अश्लील टिप्पणीको आरोप लगाएको भन्दै खण्डन गरेका हुन् ।
मंगलबारको बैठकमा उनले भ्रामक समाचारको आएको भन्दै गम्भीर आपत्ति जनाए । ‘पार्टीको दबाब सहन नसकेर त्यो मुन्छेलाई डीजी बनाउनु पर्यो भनेर बोलेको हुँ । मैले अश्लील बोलेको होइन,’ सांसद आलेले स्पष्टिकरण दिंदै भने, ‘मैले बोलेको कुरा राम्रोसँग सुन्नुस, बुझ्नुस् अनि मात्रै समाचार लेख्नुस् ।’
उनले पोखरा र भैरहवा अन्तर्राष्ट्रिय विमानस्थल निर्माणमा भएको भनिएको भ्रष्टाचारबारे संसदमा आवाज उठाउँदा आफ्नो विरोधमा हल्ला चलाइएको आरोप पनि लगाए । ‘भ्रष्टाचारको विरुद्ध बोलेको हुँ, त्यसैको प्रतिशोधमा मेरो बोलीलाई तोडमोड गरिएको छ,’ उनले भने ।
सांसद आलेले संसदीय मर्यादा भित्रै रहेर बोलेको बताउँदै सञ्चारकर्मीहरूलाई अभिव्यक्ति सन्दर्भबारे सटीक र जिम्मेवार रूपमा रिपोर्टिङ गर्न आग्रह गरे । संसदमा अभिव्यक्ति र अभिव्यक्तिको व्याख्या सम्बन्धी विवाद फेरि एकपटक चर्चाको विषय बनेको छ ।
