काठमाडौं – माइतीघर मण्डलमा सोमबार सहकारी पीडितहरूले अर्धनग्न प्रदर्शन गर्दै सरकारको उदासीनताप्रति आक्रोश पोखेका छन् । कालो कपडा लगाएर सडकमा उत्रिएका पीडितहरूले आफ्नो पीडा सरकारसम्म पुर्याउने प्रयास गरेका हुन् ।
प्रदर्शनका क्रममा उनीहरूले ‘आन्दोलन रहर नभई बाध्यता हो‘, ‘हाम्रो धैर्यलाई कमजोरी नठान’ जस्ता नारासहितका प्लेकार्ड बोकेर सरकारलाई चेतावनी दिएका थिए । प्रदर्शनमा सहभागी अन्यहरूले पनि विभिन्न माग उल्लेखित प्लेकार्ड प्रदर्शन गर्दै आफ्नो आवाज बुलन्द पारे ।
महिनौँदेखि सहकारी संस्थाहरूमा भएको रकम अपचलनका कारण मारमा परेका बचतकर्ता आफ्ना निक्षेप फिर्ता गर्न माग गर्दै निरन्तर सडकमा छन् । पीडितहरूले सहकारी सञ्चालकहरूको सम्पत्ति जफत गरी भए पनि आफूहरूको रकम फिर्ता गरिनु पर्ने माग दोहोर्याउँदै आएका छन् । तर, अहिलेसम्म सरकारले उनीहरूको मागप्रति गम्भीर चासो नदेखाएको उनीहरूको आरोप छ ।
