समाचार सुन्नुहोस :
काठमाडौँ – सर्वोच्च अदालतले आन्दोलनमा रहेका शिक्षकहरूलाई विद्यालय फर्काउने व्यवस्था मिलाउन सरकारलाई निर्देशन दिएको छ। न्यायाधीश नहकुल सुवेदीको एकल इजलासबाट जारी आदेशमा, आन्दोलनरत शिक्षकहरूको संविधानसम्मत मागहरू यथाशीघ्र सम्बोधन गर्न सरकारलाई भनिएको छ। साथै, आगामी एसईई परीक्षाको नतिजा तोकिएको समयमा प्रकाशन गर्न र कक्षा १२ को परीक्षा निर्धारित समयमै सञ्चालन गर्न समेत अदालतले सरकारलाई निर्देशन दिएको छ।
‘आन्दोलनरत शिक्षकहरूका जायज र संविधानसम्मत मागहरू तत्काल सम्बोधन गर्ने सम्बन्धमा विपक्षी निकायहरूले उचित र आवश्यक निर्णय गरी यो आदेश प्राप्त भएका मितिले ३ दिनभित्र आन्दोलनरत शिक्षकहरू विद्यालयमा फर्कि नियमित पठन पाठन गर्ने वातावरण सुनिश्चित गर्नू,’ आदेशमा भनिएको छ।
यस निर्णयसँगै, शिक्षण गतिविधिमा अवरोध नआओस् भन्ने उद्देश्यले सरकारले चाँडो कदम चाल्नुपर्ने अवस्था आएको छ।
