समाचार सुन्नुहोस :
काठमाडौँ – नेपालभर तापक्रम क्रमशः बढ्दै गएको छ र आगामी तीन दिनसम्म अझै गर्मी बढ्ने मौसमविद्को पूर्वानुमान छ। जल तथा मौसम विज्ञान विभागका अनुसार हाल देशमा वर्षा गराउने कुनै नयाँ मौसमी प्रणाली सक्रिय छैन, जसका कारण तापक्रम निरन्तर बढ्ने देखिएको छ।
मौसमविद् रोजन लामिछानेका अनुसार पश्चिमी वायु र स्थानीय वायुको प्रभाव अत्यन्तै सीमित रहेकाले हाल देशभर तातो हावा चल्न सक्ने अवस्था छ। यस्तो अवस्थाले विशेषगरी तराई क्षेत्रमा बढी असर पर्ने भएकाले सतर्कता अपनाउन सुझाव दिइएको छ।
बुधबार सबैभन्दा उच्च तापक्रम भैरहवामा ४३ डिग्री सेल्सियस पुग्ने अनुमान गरिएको छ भने जुम्लामा न्यूनतम तापक्रम ६ डिग्री रहने छ। मंगलबार लुम्बिनी र सुदूरपश्चिम प्रदेशका केही स्थानमा ४० डिग्रीभन्दा बढी तापक्रम मापन गरिएको थियो।
मधेश, बागमती, गण्डकी, लुम्बिनी र सुदूरपश्चिमका तराई क्षेत्रहरूमा पनि तापक्रम ३८ डिग्री आसपास पुगेको छ। कोशी र गण्डकी प्रदेशका थोरै स्थानमा मात्र हल्का वर्षा भए पनि मुख्य गर्मी प्रभावित क्षेत्रमा वर्षा नभएको र आगामी दिनमा पनि वर्षाको सम्भावना कम रहेको मौसमविद्को भनाइ छ।
