काठमाडौं – राष्ट्रिय सभाका सदस्य वामदेव गौतमले मुलुकको समग्र विकासका लागि सम्पूर्ण जमिन राज्यको स्वामित्वमा ल्याउनुपर्ने बताएका छन् । मंगलबार राष्ट्रिय सभाअन्तर्गतको विकास, आर्थिक मामिला तथा सुशासन समितिको बैठकमा बोल्दै गौतमले अहिलेको भू-स्वामित्वको संरचनाले योजनाबद्ध विकास असम्भव हुने दाबी गरे ।
उनका अनुसार देशको हरेक इन्च जमिन राष्ट्रियकरण गरेर मात्र आवश्यकतानुसार पूर्वाधार र सेवा योजनाहरू कार्यान्वयन गर्न सकिन्छ । पिउने पानी, विद्यालयजस्ता आधारभूत आवश्यकताहरू समाधान गर्न सरकार दृढ र योजनाबद्ध नहुनु मुल समस्या भएको उनको भनाइ छ ।
गौतमले केवल छलफल गरेर समाधान नहुने भन्दै अब क्रियाशील र उत्तरदायी नेतृत्व आवश्यक भएको बताए । प्रधानमन्त्री बन्ने आकांक्षा राख्नेहरूलाई सार्वजनिक रूपमा जवाफदेही बनाउने उपायको पनि प्रस्ताव गरे । उनले भने, ‘यदि प्रधानमन्त्री हुन चाहनेहरूले समस्या समाधान गर्न सकेनन् भने जनतासमक्ष म गर्न सक्दिनँ, कान समाएर सयपटक उठबस गर्छु भनेर वाचा गर्न लगाउनुपर्छ ।’
गौतमको धारणा अनुसार, जबसम्म मुलुकका प्रमुख समस्याहरूको समाधान गर्न सक्ने राजनीतिक इच्छाशक्ति देखिँदैन, तबसम्म मुलुकले दिगो विकासको बाटो समात्न सक्दैन ।
