समाचार सुन्नुहोस :
काठमाडौँ – आज सङ्घीय संसदअन्तर्गत तीनवटा संसदीय समितिको बैठक बस्दैछ। राज्य व्यवस्था तथा सुशासन समिति, विकास, आर्थिक मामिला तथा सुशासन समिति र विधायन व्यवस्थापन समितिले आ–आफ्नो कार्यसूची अनुसार बैठक गर्ने कार्यक्रम रहेको छ।
बिहान ११ बजे बस्ने विकास, आर्थिक मामिला तथा सुशासन समितिको बैठकमा खानेपानी, सरसफाइ र स्वच्छता सम्बन्धी कामकारबाही र आगामी आर्थिक वर्षको बजेट तयारीका विषयमा छलफल हुनेछ। बैठकमा खानेपानी मन्त्री प्रदीप यादवसँग प्रत्यक्ष संवाद हुने कार्यसूची रहेको छ। विधायन व्यवस्थापन समितिको बैठक दिउँसो १ बजे सुरु हुनेछ। उक्त बैठकमा संविधानअनुसार अझै बन्न बाँकी कानुनहरूबारे प्रधानमन्त्री तथा मन्त्रिपरिषद्को कार्यालयसँग छलफल गरिनेछ।
त्यस्तै, दिउँसो २:३० बजे राज्य व्यवस्था तथा सुशासन समितिको बैठक बस्नेछ। उक्त बैठकमा संघीय निजामती सेवा गठन तथा सेवा सर्त सम्बन्धी विधेयक, २०८० बारे कर्मचारी ट्रेड युनियनसँग छलफल गरिने कार्यक्रम छ। तीन समितिका यी बैठकहरूले नीति निर्माण र कानुनी सुधारको प्रक्रियालाई अगाडि बढाउने अपेक्षा गरिएको छ।
